Upernavik Seafoodimi siulittaasoq: Soraarsitsinissamik tunngavissaqanngilagut
Sulisitsisut Peqatigiiffianni siulittaasoq Henrik Leth isumaqarpoq Qaasuitsup Kommuuniani borgmesterip Ole Dorphip Upernavik Seafoodip pisortaanik Flemming Andersenimik aqutsinerlunneraalluni isornartorsiuinera tunngavissaqanngitsoq.
Upernavik Seafoodimi siulersuisuni siulittaasoq Anders Brøns ilisimatitsivoq, namminneq soraarsitsinissamik aamma pilersaaruteqarnatik.
Upernavik Seafood: Qalerallit suliareqqitassanngorlugit nassiunneqartarallassapput
Upernavik: Qalerallit suliffissanik pilersitsillik!
Qaasuitsup Kommuuniata inuussutissarsiorneq pillugu ataatsimeersuarnermi oqariartuutigeqqammerpaa qalerallit avammut nassiussuinnarnagit suliareqqeqqaarlugillu nassiunneqartalernissaat tamaviaarluni sulissutigineqassasoq. Sulisussaaleqisarnerli ajornartorsiutaajuartillugu tamanna piviusunngorsinnaanngitsoq Upernavik Seafoodip pisortaa Flemming Andersen oqarpoq.
Tamannali borgmester Ole Dorphip naammaginngilaa, oqarporlu sulisussaaleqisarnermut suliffissaaleqisut suliumannginnerannik peqquteqanngitsoq, matumanilu ajornartorsiutip qiterisaa tassaasoq suliffeqarfimmut tatiginninnginneq pisortallu aqutsinerlunnera:
-Avannaata aviisiani Tamanut-mi atuarneqarsinnaasutut Upernavik Seafoodip innuttaasunut akerartortutut pigunigit suliffik taamaattoq taava kia inuup suliffigiumassallugu soqutigissavaa?
Ole Dorph: Suliffissuup tusaamanerlugaanera sulisussaaleqinermik tunngaveqarpoq
Upernavik Seafoodilli siulersuisuini siulittaasoq Anders Brøns tamatumunnga isumaqataanngilaq, ilisimatitsivorlu pisortatut atorfeqartitaminnik Flemming Andersenimik soraartitsinissamik pilersaaruteqarnatik. Aamma isumaqarpoq Flemming Andersen Upernavik Seafoodimi ukiut 15-it sinnerlugit sulereersimammat apeqquserneqarsinnaanngitsoq.
- Borgmester Ole Dorph isornartorsiuiniaruni nammineerluni Upernavik Seafoodimut saaffiginnissinnaavoq, Anders Brøns oqarpoq.
Upernavik Seafood Sulisitsisut Peqatigiiffianni ilaasortaavoq, tassanilu siulittaasoq Henrik Leth oqarpoq Qaasuitsup Kommuuniata inuussutissarsiornermik ingerlataqartunik tapersersuisussaalluni taamatut pissusilersornera tupigalugu.
- Ole Dorphip Halibut Greenlandimi siornatigut siulittaasuusimanera malunnarpoq, immaqaana taanna eqqarsaatimigut suli qimavissimanngikkaa, Henrik Leth oqarpoq.
Upernavik Seafoodimi pisortaq Flemming Andersen erseqqissaavoq, borgmester Ole Dorph Upernavimmut tikissagaluaruni pulaarnissaminut tikilluaqqusaareertoq.
-Ole Dorph Upernavimmut tikissagaluaruni pulaarnissaminut tikilluaqqusaareerpoq, tusagassiuutit aqqutiginagit inussiarnersumillu kiinnerluni oqaloqatigiinnissaq tamatsinnut angusaqarfiunerpaassaaq, Flemming Andersen oqarpoq.