Upernavik Seafood: Unammilleqatigiinneq piumaneruarput

Tunisinermi akit apparujussuarnerat KNAPK-mit naammagineqanngeqaaq. Akilli allanngorarnerat iluaqutissartaqartoq Upernavik Seafoodip pisortaata Flemming Andersenip oqaatigaa.

Taassuma nassuiaatigaa, kiilumut akiusut ingerlaannartumik atuutilersumik 20 koruuninut qaffassimallugit, tassa qanittukkut umiarsuarnit tunitsiviusunit unammillerneqarnermik nalaani. Suliffissuit aalisakkanik suliassaqartuarnissat qulakkeerniarlugu taamaaliorsimanerarpoq.

- Naleqqussarnissaq ajornakusoorami. Ingerlatseriaaserpummi akisuujuvoq, taamaammat unammilleqatigiinneq apeqqutaatillugu akinik sukkasuumik allanngortiterisariaqartarpugut, taanna oqarpoq.

Qalerallit kiilumut akii apparsimavaa
Flemming Andersenip, Upernavik Seafoodimik ingerlatsisuullunilu pisortaasup qalerallit kiilumut akii 13,50 koruuninut apparsimavaa, tamnannalu KNAPK-p nuannarinngilaa, akillu qaffasitsinneqaannarnissaat piumanerullugu. Aalisartut piniartullu kattuffiata akitoqqat tassa kiilumut 20 koruunit piumanerugaluarpai, Qeqertarsuummi Tunuani kiilumut akigitinneqartut 17-19 kouunit missaanniittarmata.

- KNAPK inuussutissarsiornermik qullersanit pigineqartumik piumaneruvoq, Flemming Andersen oqarpoq, taassumalu qalerallit kiilumut 13,50 koruuneqarnerat KNAPK-mit kamaatigineqarmat paasiuminaatsippaa, tassami illoqarfimmi sanilerisaanni Uummannnami kiilumut 13,50 koruuneqartitsinissaq, KNAPK-p isumaqatigiinniarnermini angusimammagu. 

- Tassami aalisartoq Uummannameersoq aamma aalisartoq Upernavimmeersoq annerusumik assigiinngissuteqanngimmata, Flemming Andersen oqarpoq.