Upernavik Seafood: Kiilumut akit siunissami aalajangersimaannalissapput
Tamanna pivoq, Royal Greenlandip Polar Seafoodillu nunarsuarmi aalisakkanik niuerfinni, Kalaallit Nunaata imartaaneersunik tunisassianik pitsaasunik niueruteqartarneri eqqarsaatigalugit nittarsaassisarnerup saqqummiussusarnerullu tungaasigut suleqatigiiginnarnissaat pitsaanerusoq anguniarneqarmat.
Aalisartunut kingunerlutsitsissanngilaq
Taama suleqatigiilernermi Upernaviup eqqaani unammilleqatigiinneq minneruleraluartoq, taamaattoq tamanna aalisartunut ajoqutaassanngitsoq, Upernavik Seafoodip pisortaata, Flemming Andersenip neriorsuutigaa.
- Qalerallit akii KNAPK-mit Royal Greenlandimillu siunissami isumaqatigiissutigineqartassapput soorlu ullumikkut taama pisartoq. Upernaviup eqqaani akit Upernavik Seafoodimit allanngortinneqartarnissaat maanna takorlooruminaallivoq.
Flemming Andersenip taama oqarnerminut tunngavigaa, Upernaviup eqqaani qalerallit kilumut akii namminneerlutik aasaq manna 20 koruuniniit 14 koruunit halvtreds oorinut appartinneranni, KNAPK-mit isornartorsiorneqarmata oqarlutik taama appaaneq aalisartunut ajortumik sunniuteqassasoq.
AAMMA ATUARUK Royal Greenland aamma Polar Seafood piginneqatigiissutinik paarlaapput
Qalerallit akiisa isumaqatigiinniutigineqartarnissaat siunissami assigiinnerulernissaat, Flemming Andersenip maanna neriuutiginerarpaa.
- Upernavik Seafood Royal Greenlandimit maanna tamakkiisumik pigineqalerpoq, taamaattumik KNAPK-p Royal Greenlandillu akinik isumaqatigiissutaat siunissami atorneqartalissassut neriuutigaara.
Unammilleqatigiinneq piujuassaaq
Flemming Andersen oqarpoq eqqaamaqqullugulu, qalerallit akiinik unammilleqatigiinneq Upernaviup eqqaani siunissami suli ingerlanneqartartussaassammat, tassa Halibut Greenland taavani aalisartunit tunitsivigineqarsinnaammat.
- Taakku akinik siunissami qaffaassappata, taava qaffaasinnaanerput eqqarsaatigisariaqassavarput soorlu taamaaliortareersugut, Upernavik Seafoodip pisortaa, Flemming Andersen taama oqarpoq.
