Upernavik nammineq pisuuvoq

Upernaviup kommuneani atuartunut annernut ineqarfiliornissaq kinguarsarneqarmat kommune nammineq pisuusoq, Ilinniartitaanermut naalakkersuisoq, Doris Jakobsen Radioavisimut oqarpoq.

- 2007-mi atuartut ineqarfissaannik sanaartornissaq kissaatigalugu kommune allassimasoq ilumoorpoq. Sanaartugassatulli kissaatigineqartut allakkani aalajangersimasumik tulleriiaarneqarsimanngillat. Kommunilli pilersaarusiaani takuneqarsinnaavoq, atuartunut ineqarfiliornissap 2008-mi aallartinnissaa kissaatigineqartoq, taamattaarlu atuartut ineqarfissaannik kissaateqarnerup aqquserngit allisarneqarnissaat utaqqissagaa atuarneqarsinnaalluni. Sanaartugassatut kissaatigineqartut taakku malikkusuppavut, Doris Jakobsen oqarpoq.

Doris Jakobsen Radioavisimit ualeq aperaarput, atuartut inissaannik sanaartornissaq maanna aallarteriiginnarsinnaannginnersoq, ukioq sanaartorfiusussaq kukkullugu allattoqarsimagunarmat, aamma kikkut tamarmik ilisimalereermassuk atuartut ineqarfissaat Upernavimmi amigaataasoq, tamatumunnga Doris Jakobsen ima akivoq:

- Taamaaliorsinnaanngilavut, atuartunummi inissialiornissamut aningaasat killeqarput. Upernavimmiulli ikiorniarsarissavakka, pisortaqarfiit tamaasa periarfissaasinnaasunik ujaaseqqussallugit, naalakkersuisunut ilaasortaq oqarpoq.