Upernavik ikioqquvoq

Pisut ajorluinnarput, allaat ajunaarnersuartut taaneqarsinnaallutik.

Oqaatsit taama sakkortutigisut Upernaviup inunnik isumaginnittoqarfiata Ilaqutariinnermut pisortaqarfimmut saaffiginninnermini atortariaqalersorivai, imminorneq tuniluuttutut immat. Upernavimmi inunnik isumaginnittoqarfimmi sulisut qasupput. Ruth Larsen, kommunimi pitsaaliunermut siunnersorti aperaarput: Susoqartoruna?

- Aamma uagut taamatut immitsinnut apererusuppugut. Ilungersunartorujussuarmik killiffeqarpugut. Imminortarnerit piffissap sivikitsuarannguup iluani arfineq-pingasut naammattooratsigit. Ataatsimut isigalugu inuusuaqqat ikannerusut (amerlanerusut, aaqq.) oqarsinnaavunga, Ruth Larsen taama oqarpoq.

Upernavimmi nunaqarfiinilu qulingiluani, 3.000-t inorlugit inoqartumi marsimiit aggutsimut inuit arfineq-pingasut imminorsimapput, kingulliit marluk sapaatip-akunnerani kingullermi pisimallutik.

Nukissaaleqinertik pillugu Upernavimmi Inunnik isumaginninnermut pisortap Dariusz Sobczynski-p, Ilaqutariinnermut pisortaqarfik Nuummiittoq ikioqqusissutinik ullumi allaffigaa. – Tuaviortumik ikiortariaqarpugut, imminornerit ima tuniluutsigilerput, allaat ”ajunaarnersuattut taaneqarsinnaasumik”.

Imminornerit marluk nunaqarfiit avannarlersaanni sapaatip-akunnerani kingullermi pisimapput. Nunaqarfiit aningaasarliorput ineqarnerlu sussaanani, pisortaq allappoq.

- Uagut ilungersunartorujussuarmik maani inissisimagutut, nukissaarutilerpugut assigiinngitsut peqqutigalugit aqqusaartakkagut aamma imaannaanngitsooreeramik taava kingullermik ikiortissarsioratta pingasuinnaat – sakkortugaluarpoq taama oqassallunga – pingasuinnaat imminornikuusut ornittariaqarnikuuaagut, assigiinngitsunik piginnaanilinnik ikiorneqariarluta. Maannamulli killiffigaarput arfineq-pingasut qangali imminoreersimasut.

Imminortut ilaat tallimat inuusuttunnguupput, taamaattumik Ruth Larsen neriuppoq, Nuumminngaanniit ikiuiartortussat tassaassasut psykologit kalaallisut oqaasillit.

Upernavimmi sulisut qulingiluaasussaagaluit sisamaannaat maanna suligallarput.

- Iliuuseriniarsarivarput maanna suleqatigiit marluusut kingullermik imminorfiusimasumut nunaqarfitsinnut orniguttussaapput utaqqiisaasumik tapertaajartorlutik, Upernavimmi pitsaaliuinermut siunnersorti Ruth Larsen oqarpoq.

Ilaqutariinnermut pisotaqarfik ullaap tungaagut oqaaseqartissinnaasimanngilarput.