Upernavik 2006-imi kulturikkut illutaassaaq

Upernavimmi innuttaasut, nunaqarfiit qulingiluat ilanngullugit 2.900-it missaaniittut, 2006-imi septemberimi kulturikkut illorsuartaartussanngorput.

Kulturikkut illorsuassaq, timersornermut, isiginnaartitsinermut katerisimaarnernullu allanut atorneqassaaq:

- Nalinginnaasumik timersornermut atorneqassaaq. Aammattaaq innuttaasunut kulturikkut sammisassaqartitsinernut assigiinngitsunut, soorlu isiginnaartitsinernut allarpassuarnullu atorneqartussaavoq. Meeqqaniit utoqqarnut, innarluutilinnullu eqaatsumik aaqqitaavoq. Naatsumik oqaatigalugu illu eqaatsumik aaqqitaavoq, Upernavimmi borgmesterip tullia, Edvard Immanuelsen Kristiansen taama oqarpoq.

Edvard Immanuelsen Kristiansenip aamma oqaatigaa, Upernavimmi innuttaasut kulturikkut illussaq pisariaqarteqigaat, katersortarfik atuarfiullu eqaarsaartarfia naammakkunnaarsimammata.

Upernavimmi kulturikkut illorsuassaq 36 millioni koruuninik naleqartoq, Viking Byg Aps-imit sananeqassaaq.

Namminersornerullutik Oqartussat 15,6 millioni koruuninik, Upernaviup Kommunea 5,1 millioni koruuninik Den Lokale Anlægsfondilu 2 millioni koruunik aningaasaliissuteqarput. Aningaasaliissutit saniatigut 13 millioni koruuninik Den Lokale Anlægsfondimut Upernaviup Kommunea attartorsinnaanerminut isumaqatigiissuteqarpoq.