Upernaaru aatsaat palasimik atorfinitsitsisoqassaaq
Danmarkimi ilageeqarnermut ministerip Danmarkimi palasimik kalaallimik, ilagiinnut kalaallinut Danmarkimut nunasisimasunut sullissisussamik atorfinitsitsiniarluni siorna novembarip qaammataani nalunaarutigaa.
Atorfimmik pilersitsinissamut aningaasatigut tunngavissat juulip qaammataani inissinneqarput, Danmarkimili ilagiit palasitut atorfik pillugu nutaarsiassanik suli tusagaqarsimanngillat. Ukiortaalli aallartinnerani pisoqartussanngorpoq. Palasitaassap inissinneqarfissaani Aarhus Stiftimi biskoppi Kjeld Holm taama neriorsuuteqarpoq.
- Atorfik januaari qiteqqunnerani inuttassarsiuunneqassaaq. Atorfiup oqaluffimmut sorlermut nuunneqarnissaa ajornartorsiutigisimagatsigu kinguaattuungaatsiaqqavugut. Taamaammat atorfik inuttassarsiuunneqalerpat Aarhusip provsteqarfiani oqaluffimmut suli aalajangiunneqarsimanngitsumut atanissaa allagarsiussami allassimassaaq, Kjeld Holm KNR-imut oqarpoq.
Palasitaassap aappaagu apriilip aallaqqaataani atorfinitsinneqarsinnaanissaa neriuutigaa. Maannakkutut inissisimasoqartillugu, kalaallinut Danmarkimut nuussimasunut kuisitsinernut, apersortitsinernut, katititsinernut ilisinernullu kalaallisut ingerlanneqartunut ilagiit kalaallit akiliuteqarumanngillat. Juulip qaammataanili taamatut inissisimasoqarpoq. Kjeld Holmip tamanna paasiuminaatsippaa.
- Taamatut aaqqissuussisoqarsimanera eqqumigiivara. Akuliuffigissanngilara, aamma akuliuffigisussanngilara. Isumaqaraluaramami tamanut inissaqartitsisoqartariaqaraluartoq. Palasitaassaq atorfinitsinneqariaruni Danmarki tamaat angallavigalugu oqaluffinni suliassanik isumaginnissaaq kiisalu Aarhusimi aalajangersimasumik naalagiartitsisassalluni.
Nammineq piumassutsimik Danmarkimi najugaqaraanni Namminersorlutik Oqartussallu palasiannik atuerusulluni, qinnuteqaateqarnermi maannakkorpiaq periaaserineqartoq atorneqassanngilaq, biskoppi naqissusiivoq. - Palasi atorfinitsinneqartoq Aarhus Stiftimi palasit 340-sut allat assingalugit kiffaanngissuseqartinneqassaaq. Palasit sulinertik nammineerlutik aaqqissuuttarpaat.
Biskoppip neriuutigaa Namminersorlutik Oqartussat palasiata kalaallillu Aarhusimi palasiata akornanni arlaatigut suleqatigiinnermik pilersitsisoqarsinnaassasoq.
- Atorfik piareeriarpat immaqa Sofie Petersen oqaloqatigisinnaavara kalaallillu palasit marluusut akornanni suleqatigiissutigineqarsinnaasut pillugit isumaqatigiissuteqarsinnaanersugut paasiniarlugu - palasip Danmarkimi ilageeqarnermut ministeriaqarfimmit imaluunniit ilagiinnit kalaallinit atorfinitsinneqarsimanera apeqqutaatinnagu.
Kalaallit Nunaata Qeqqani Domprovstip Isak Davidsenip Namminersorlutik Oqartussat palasiata siunissami kalaallinik Danmarkimut nuussimasunik annikinnerusumik sullissisinnaanissaa tunuarsimaarfiginngilaa.
- Soorunami ammaffigaagut. Tassungali atatillugu eqqaarusuppara, aamma uagut aningaasartuutitigut sipaarniartariaqaratta. Kalaallillu nammineq kajumissutsiminnik Danmarkimut nuussimasut aamma palasinit danskiusunit sullinneqarnissaminut periarfissaqartut oqaatigalugu.
