Killiffik Upernaaq manna suliaqarfiungaatsiarlunilu qassiiliorfiuvoq

Meeqqanut qilanaarutaasinnaasumik inatsissartut akuersissuteqarput. Meeqqammi ikorfartorneqarnissaanut pisinnaatitaaffiit nukittorsarneqaqqipput. Ilaatigut meeqqanut atugarliortunut siusisukkut iliuuseqartarnermut aammalu naluaaruteqarteqartoqarsimatillugu iliuuseqapallattarnissamut tunngasuni.

Nunatsinni innarluutillit ikiorneqarnerulernissaat upernaakkut ataatsimiinnermi anguneqartut aamma ilagaat, innarluutillimmi illersuisoqalertussanngorput.

Avataata imartaani avatangiiisinik allanngutsaaliuinissaq aamma akuersissuteqartoqarpoq, tunumi kalaallisuuliorfittaarnissaq kiisalu oqaatsit pillugit siunnersuutinik akuersissuteqartoqarluni.

Suliassalli ilaat piffissami sivisunermik suliarineqarnissaat pisariaqarsimavoq. Sullivinni avatangiisit pillugit inatsisinik angerlaassinissat  ukiakkut ataatsimiinnissamut kinguartinneqarput.

Pisortat suliffeqarfiutaanni ilinniartut sungiusartullu amerlanerulersinnissaannik siunnersuut oqallissutaasoq aamma ataatsiminnerup tullissaanut nuunneqartut ilagaat.

Inatsisartulli ataatsimiinnerisa saniatigut upernaaq manna aamma amerlasuutigut qassiiliorfiuvoq.

Vittus Qujaukitsup FN-mut naammagittaalliornera, Inatsit tunngaviusut pillugit isumalioqatigiissitap suliassai pillugit patsuungassuteqarneq, Simukkormiullu iluminni aporaannerat upernaakkut ataatsimiinnermi initungaatsiarnikuupput.

Tamakkua pisut Naalakkersuisut nikisiternerannik kinguneqarpoq, Vittus Qujaukitsoq tunnarluni, Erik Jensen Naalakkersuisunngorluni, naalakkersuisoqarfiillu nuutsiterneqarlutik.

Aqqaluk Lyngep unnugu Qanorooq aallartippat Inatsisartuni Naalakkersuisunilu pisut pillugit nalilersuinera isiginnaarsinnaavat.