Upalungaarsimasut mianersoqqusisut: Unnuami innaallagissersuineq ulorianarsinnaavoq
Inuit amerlanerpaartaat taamaaliortarput. Tassa oqarasuaatertik angallattagaq innaallagissersortariaqalersimasoq takuleriaraangamikku innartinnatik innaallagissersulertarpaat.
Taamaaliortarneq inummik annaasaqarnermik kinguneqarsinnaammat, Nuummi Qatserisartut taamaaliortoqartarunnaarnissaannik kaammattuuteqarput.
Angerlarsimaffimmi ikuallattuulernermut kalerrisaaruteqarnissaq pingaartoq, Kommuneqarfik Sermersooq nittartakkamini allappoq. Ikuallattuulernermut kalerrisaarut inuunermik annaassisinnaammat, angerlarsiamaffiup qiterpassissuaniititsinissaq anngajaamillu angerlarsimaffeqaraanni arlalinnik peqarnissaq kaammaattuutigineqarpoq.
- Ikuallattuulernermut kalerrisaarut inuunermut sillimmasiissutini akikinnerpaavoq. Ikuallattuulernermut kalerrisaaruteqaraanni sillimalluni sinittariaqanngilaq. Najugaqartunit arajutsineqartumik unnuami ikuallattoqalernerani inneq sukkasoorujussuarmik siaruaassinnaasarpoq. Taamaammat angerlarsimaffiit tamarmik ikuallattuulernissamut kalerrisaaruteqartariaqarput, Kommuneqarfik Sermersuup upalungaarsimanermi pisortaa Jes Damgaard Andersen oqarpoq.
Ikuallattoornissamut ulorianaqisoq
Elektronikkimut innalernermi innaallagissersuiniaraanni innaallagissersorniakkap siniffiup eqqaanut ikuallajasumulluunniit ilineqassanngilaq.
- Nalaasaarfik siniffilluunniit ikuallajasuupput. Elektronikkit qipiup akitsilluunniit ataanni innaallagissersorneqaraangamik kissattoorsinnaasarmata ikuallattoorujussuassutaasinnaavoq, Jes Damgaard Andersen oqarpoq.
Tamatuma saniatigut elektronikkit akornutilit, soorlu innaallagissersuut akornutilik, atorneqartannginnissaat kaammattuutigaat.
Ikuallattoorneq kingulleq Nuummi Tuapannguani inissiarsuit ilaanni pivoq, tassanili ajoqusertoqanngilaq.
