Upalungaarsimanissamut sillimaneq misissuiffigeqquneqarpoq
Upalungaarsimanissamut sillimanerup pitsanngorsarnissaanut periarfissat misissuiffigeqqullugit, attaveqarnermut naalakkersuisup Jens Napaattuup naalagaaffik kiisalu Folketingimi ilaasortat nunatsinneersut attaveqarfiginialerpai. Taamatuttaaq naalakkersuisut siulittaasuata Hans Enoksenip statsminister Anders Fogh Rasmussen allakkatigut aamma saaffigereerpaa.
Angallatinik minnerusunik angallateeqqanillu ajunaarnerit pisartut, qanittukkullu angut 21-nik ukiulik Qasigiannguanukartilluni maqaasineqalersoq eqqaallugu, Jens Napaattooq isumaqarpoq, upalungaarsimanissamik sillimanerup misissorluarneqarnissaanut pissutissaqarluartoq.
Nunat tamat imaatigut silaannakkullu angallanneq pillugu isumaqatigiissutaanut Danmark atsioqataasimavoq. Naalagaaffik nunatsinnut 7 mio. kr.-nik tapiisarpoq nunatta qeqqani Qeqertarsuullu Tunuani ujarlernerit annaassiniarnerillu qulakkeerumallugit. Tamaattumik upalungaarsimaneq pillugu angallannermik suliallit ukiortaamit oqaloqatigissallugit naalakkersuisup aamma pilersaarutigaa.
