Upalungaarsimanissamut piumasaqaatit minnerpaaffilerneqarsimanngillat

Minnerpaaffiliisoqarnissaalu pisariaqanngitsoq, naalakkersuisoq Jens B. Frederiksen isumaqarpoq.

- Illoqarfinni nunaqarfinnilu suut atorfissaqartinneqartut apeqqutaalluinnarpoq, oqaatigisariaqarparalu kommunit uatsinninngarnit ilisimasaqarnerummata, Ineqarnermut Attaveqarnermullu Naalakkersuisoq Jens B. Frederiksen oqarpoq.

Taamaattorli Ineqarnermut Attaveqarnermullu ataatsimiititaliaq akerlianik isumaqarpoq, pissutigerpiarlugu najukkani assigiinngitsuni pissutsit assigiinngissutilerujussuummata upalungaarsimanissamut piumasaqaatit minnerpaaffilerneqartariaqartut. Tamanna Jens B. Frederiksenip isumasioqatigineratigut saqqummerpoq. Taassuma erseqqissarpaa atortut kisimik kommuninit akisussaaffigineqartut aammalu Naalakkersuisut suliassami tamatumani kommuninik nakkutilliinngitsut, aammattaaq ataatsimiititaliap tamanna isumaqatiginngilaa.

Naak isumaqatigiinngitsoqaraluartoq ataatsimiititaliap inatsimmut siunnersuutip akuersissutigineqarnissaa tamarmiulluni inassutigaa, taamaattorli Naalakkersuisut ukiaru ataatsimiittoqalerpat allannguutissatut siunnersuuteqareernissaat kajumissaarutigalugu.

Jens B. Frederiksen oqarpoq: Ataatsimititaliap kissaateqarnera Naalakkersuisut tungaannit soorunami eqqaamasassatut allapparput, tamannali soorlu ataatsimoortumik tapiissutit suliassallu taamaattut tapiissutini tassaniitinneqassanersut pillugit kommuninik isumaqatigiinniutigineqarneranni inissisimajumaartut.

Inatsisissatut siunnersuut marlunngormat Inatsisartuni aappassaaneerlugu oqaluuserineqarpoq, ilaasortallu najuuttut 26-t tamarmiullutik siunnersuut akuersaarpaat.

Jens B. Frederiksenip erseqqissarpaa, annaassiniarnissamut upalungaarsimanissap malinnaasinneqarnissaanut aningaasaliissuteqarumaartoq. Tassani atortut ilinniartitaanerlu pineqarput. Ataatsimiititaliamili ikinnerussuteqartut isumaqarput siunnersuummi aningaasanut immikkoortortat tamakkerlugit nassuiarneqarsimanngitsut.