Upalungaarsimaniarnermik aasaru sungiusalersut
Sungiusarneq taaguuserneqarsimavoq Grønland LIVEX 2016, sakkutuullu nunanit assigiinngitsuneersut peqataatinneqassapput. Sungiusarnerup siunertaraa Danmarkip Nunattalu ajunaarnersuaqartillugu upalungaarsimaniarnerisa nukittorsaavigineqarnissaa, annertuumik pisoqartillugu pilersaarusiornikkut, ingerlatsinikkut periaasissatigullu piareersimaniarnissaq pitsanngorsarneqassalluni, Hjemmeværnet nittartakkamini taama allaaserisaqarpoq.
- Sungiusarnermi Issittumi Upalungaarsimasuutitat ineriartorteqqinnissaat aamma siunertaavoq, Illersornissaqarfimmeersut Hjemmeværnimeersullu peqataatinneqassallutik, sungiusarnissamut akisussaasuusoq major Anders Pedersen, Jyllandip avannaani qeqqanilu Pilersaarusiornermut Suliassanullu immikkoortortaqarfimmeersoq hjv.dk-mut taama oqarpoq.
Umiarsuit aportut
Sungiusarnermi umiarsuaq assartuut umiarsuarlu takornariartaat Nuup Kangerluani aportuusaartinneqassapput. Siullertullu ujaasineq annaassiniarnerlu sammineqassapput, tullertullu mingutsitsinermik akiuiniarneq sungiusarnermi sammineqassalluni.
Hjemmeværnimit politiit, tusagassiisartut, stabsofficerit nunallu immikkoortuinit pingasuneersut 100-t missaat peqataanissaat pilersaarutaavoq, taakkulu nunatsinneersut 100-t peqatigalugit umiarsuarmi takornariartaammiitiinneqassallutik.
