Upalungaarsimaniarneq pikkorissaasoqarneratigut pitsaanerulerpoq
Immikkut ilisimasallit nunanit tamalaaneersut tassanngaannartumik napparsimanermut atatillugu ikiuiniarnermik nakorsanik peqqissaasunillu nunatsinnit tamaneersunik pikkorissaasuupput.
-Pikkorissaarnermi matumani peqataasut qujanartumik suliaqarfik taanna ilisimasaqarfigilluareerpaat, taamaammat uagut suliassarput tassaasimavoq peruluttunik katsorsaanerup ataqatigiissillugu aaqqissuunnissaanik ilinniartinnissaat. Nakorsat peqqissaasullu ilisimaarilluinnartussaavaat, taamaammat pisuusaartitsilluta sungiusaqattaartarpagut. Taamaaliornikkut peruluttoqartillugu ingerlaannaq iliuuseqarnissaat aamma anguneqassaaq, pikkorissaasut pisortaat Freddy Lippert, Københavnimi upalungaarsimaniarnermi pisortaq taamatullu ilinniartitsinermik ukiorpassuarnik milisilittagalik oqarpoq.
Naskorsat peqqissaasullu tunumit kitaaniillu upalungaarsimaniarnerup iluani pikkorissarnissaminnut periarfissinneqarmata sungiusarluni atuagarsorlunilu sulittoqarpoq. Apersuisut imaaginnavipput, peqataasullu inuusanik sungiusartinneqaramik pimoorussilluuinnarput.
-Nakorsat taamatut nalaataqartarnera qujanartumik akuttuvoq, qanorlu iliortoqartarnissaa maanna paasisaqarfigineqarpoq. Ulluni marlunnik maani katersuussimanitsinni taamatut nalaataqartillutik qanoq ingerlaannartumik iliuuseqartarnissartik pillugu annertuumik misilittagaqalerput. Uummammik unittoortut aniguinissaannut periarfissaat taamaasillutik pitsaanerujussuanngorput, Freddy Lippert pikkorissaanermi unillatsiarnermi knr.gl-imut oqarpoq.
Suliaqarfimmi nutaanik takkuttoqartuaannarpoq, taamaammat peqqissaarnermi sulisut tamakkuninnga pikkorissartuarnissaat ajornakusoorsinnaasarpoq. Ulluni marlunni pikkorissaanermi peqataasut angerlarunik suleqatitik ilinniartissinnaavaat.
-Aallartitatullusooq ilinniartippagut, taamaaliornikkut angerlarunik suliffeqarfimminni pikkorissaasinnaanngorlugit taamaalillutillu paasisatiknutaat suleqatiminnut ingerlateqqissinnaanngorlugit. Maani paasisaat nunani tamalaani ilisimasarilikkat nutaajunersaraat, taamaammat Kalaallit Nunaanni ileqqorineqartoq pitsaasoq ingerlateqqinneqarpoq, tassalu peruluttunik katsorsaanermut tunngatillugu siuttuujuarnissaq, Freddy Lippert nassuiaavoq.
