Upalungaarsimanermut ilinniarfeqalernissaq pitsaanerpaamik sunniuteqassappat isumaqarpugut aamma nunatsinni qatserinermik imaluunniit upalungaarsimanermik ilinniartitsisinnaareersut inerisarneqarlutik atorluarneqassasut, Poul Olsen taama oqarpoq.Assi: Forsvaret

Upalungaarsimanermut ilinniarfissap piareersarneqarnerani Qatserisartut Peqatigiiffiata suleqataanissartik kissaatigivaat

Nunatsinni Qatserisartut Peqatigiiffiata Upalunaarsimanermut Ilinniarfissap Kangerlussuarmiittussap ammarneqarnissaa nuannaarutigisorujussuuaa

Peqatigiiffiup siulittaasua Poul Olsen Kalaallit Nunaata Danmarkillu illersornissamut isumaqatigiissut atsiugaat pillugu KNR-imut taama oqarpoq.

- Kalaallit Nunaanni Qatserisartut peqatigiiffianinngaanniit nuannaarutigisorujussuuarput taamatut atsioqatigiittoqarmat,

Poul Olsen taama oqarpoq.

Tunngaviusumik upalungaarsimanermut ilinniarfiulersussaq immikkut maluginiarpaa. Ilinniarfik pilersaarutit malillugit 2023-mi ammarneqartussaq ukiumut ilinniartunik 20-nik ilinniarfigineqarsinnaassaaq. Ajunaarnersuaqarnerani ikiueqqaarnermut annaassiniarnermullu tunngasuniit aallaammik igeriarneq sakkunillu ilinniarneq taavalu aamma ikuallattumi pujorsiorneq ilinniassavaat.

Upalungaarsimanermut ilinniarfissap piareersarneqarnerani qatserisartut suleqataatinneqarnissartik kissaatigivaat

Namminersorlutik Oqartussani naalakkersuisoqarfiit arlallit Danmarkimilu Illersornissamut Ministeriaqarfimmeersunik suleqatigiinnik pilersitsisoqarpoq, ilinniarnerup aallartinnissaanut tunngatillugu suliaqartinneqassallutik.

Nunatsinni Qatserisartut Peqatigiiffianni siulittaasoq Poul Olsen isumaqarpoq suliamut tassunga ilanngunneqartariaqarlutik.

- Upalungaarsimanermut ilinniarfeqalernissaq pitsaanerpaamik sunniuteqassappat isumaqarpugut aamma nunatsinni qatserinermik imaluunniit upalungaarsimanermik ilinniartitsisinnaareersut inerisarneqarlutik atorluarneqassasut.

Poul Olsen taama oqarpoq.

Issittumi piginnaasanik annertusaanermut tunngasumik Kalaallit Nunaat Danmarkilu isumaqatigiissummik sapaatip akunnerata siuliani marlunngornermi atsioqatigiipput.

Nunanut Allanut Naalakkersuisumit Vivian Motzfeldtimit aamma qallunaat illersornissamut ministerianit Morten Bødskovimit isumaqatigiissut atsiorneqarpoq.

Tunngaviusumik upalungaarsimanermut ilinniarfissamut Kangerlussuarmiittussamut 50 millionit atugassanngortinneqarput.

Isumaqatigiissummi aammattaaq ilaavoq tunngaviusumik upalungaarsimanermut ilinniarfissami qatserisartutut ilinniarfiup inissaqartinneqarsinnaanera isumaliutigineqarsinnaasoq. Taamaattoqassappat Kalaallit Nunaanni Qatserisartoqarfiit suliassaq taanna tigussagaa isumaqatigiissummi allaqqavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl