Upalungaarsimaneq SAR pitsanngorsarneqartariaqarpoq
Angallannermut ministeri Henrik Dam Kristensen upalungaarsimanermik SAR-imik misissuivoq. Taannaavoq umiarsuit nunatta imartaani ajutuussappata upalungaarsimassutaasoq. Umiarsuit qulimiguullillu pisariaqarfiani ikiuukkasuartussaapput.
- Maniinninni sungiusartut najuuffigaakka takuaralu inuit pikkorissut suleqataasut. Kisianni taanna oqaatigereerlugu taasariaqarpoq qulimiguulliit pisoqaavallaartut qanittumilu taarserneqartariaqassagunarlutik. Unammilligassammi takkussortuarput umiarsuit takornariartaatit issittumi angallannerulermata aammalu Vestpassage aqqutaalerluni. Isumaqarpunga Kalaallit Nunaata Danmarkillu kisimiillutik suliassaq naammassisinnaagaat. Nunat tamalaat uani suleqatigiittariaqarput uanilu Issittumi siunnersuisooqatigiit eqqarsaatigaakka, Henrik Dam Kristensen oqarpoq.
Atortullu nutaat pissarsiarineqartussanngoraangata apeqqutaalersarpoq kikkut akiliissanersut. Uanilu Henrik Dam Kristensen politikkeritoqqatut eqqarsarpoq.
- Kalaallit Nunaat Danmarkilu pineqartillugit eqqortumik iliortariaqarpugut. Ajornartorsiut misissussavarput aaqqiissutissamillu nassaarluta. Taava aningaasartaanut tunngasut allat isumaqatigiinniutigiumaarpaat, Henrik Dam Kristensenip KNR.gl-mit Nuummi oqaloqatigineqarluni oqarpoq.