Upalungaarsimaneq Aasianni sungiusaatigineqalerpoq
Sungiusarnerup upalungaarsimasussat periarfississavai atortut Cairn Energyp Aasianniititaasa qanoq atornissaannik sungiusarnissaannut.
Qaasuitsup Kommuniani upalungaarsimanermut pisortap Johan Høegh Hansenip sungiusarnissaq qilanaaraa.
- Nuannaarutigaarput atortut Cairn Energyp pigisaasa sungiusarnissaat maanilu suleqatigiinnerup misilinnissaa, Johan Høegh Hansen oqarpoq nangillunilu:
- Qilanaarpugut uuliasioqatigiiffiup upalungaarsimasuutitaanik suleqateqarnissatsinnut.
Upalungaarsimanermut pisortaq uuliamik maqisoortoqassagaluarpat uuliamilluunniit misissueqqissaarnermi ajutoortoqassagaluarpat suleqatigiinnut sulisitaasussanut pisortaavoq.
Aalajangersimasumik Nuummi suleqatigeeqarpoq taasamik "Emergency Response Group", Johan Høegh Hansenilu suleqatigiinni taakkunani pisortap aapparaa.
Suleqatigiit taakku uuliasiortoqarnerani ulloq unnuarlu pigaartoqartoqartarput, sulinissaminnullu piareersimallutik. Suleqatigiinniipput politiit, peqqinnissaqarfik, Kangilinnguani Sakkutooqarfik, Aatsitassarsiornermut Pisortaqarfik, Cairn kiisalu qatserisartoqarfimmiit marluk, suleqatigiinnut pisortaasut.
