Unnuk kulturisiorfimmi kalaallit alutorineqarluarput
Københavnimi Kulturikkut unnussiornermi Kalaallit Illuat Løvstræde-miittoq inunnik 2.000-nik takuniarneqarpoq. Tassani takutitsinerit arlaqarput ilaatigut atisanik takutitsisoqarluni, bluesimit nipilersortoqarluni, eqqumiitsulianik saqqummersitsisoqarluni, filmertitsisoqarluni erinarsoqatigiillu tusarnaartitsillutik.
Københavnimi kulturikkut unnussiorneq pillugu, aviisi Politiken allappoq qulequtsiullugu 'Takuniagassat pitsaanerit tallimat', taakkununnga ilaavoq Kalaallit Illuanni atisanik takutsineq, Isaksen Design-imit aaqqissuunneqartoq. Københavnimi takuniagassat 500-nik ikinnerunngillat, tassalu Kalaallit Illuat taakkununnga ilaalluni.
Kalaallit Illuata unnussiortitsinermi peqataanera pingaaruteqartoq, illup kulturikkut aamma tusagassiinikkut suleqataata, Vivi Nielsenip oqaatigaa:
- Ukiut 15-nissaa peqataavugut, taamaalilluta Københavnimi Kalaallit Illoqarnera kikkunnut tamanut ilisimaneqalersittarlutigu, aammalu pilersaarutigut inunnut amerlanerpaanut saqqummiussinnaasarlutigit. Taamaattumik uangutsinnut pigaaruteqarpoq unnussiortitsinernut peqataasarnissarput, Vivi Nielsen oqarpoq.
Københavnimi Kulturikkut unnussiortitsisarnerni Kalaallit Illuat ukiut 15-nissaa peqataavoq. Ukiuni kingullerni sisamani Isaksen Design peqataallutik.
- Kulturikkut unnussiornerni aatsaat takuniaasut amerlaqaat, taamaattumik peqataanerput takoqqusaarneruvoq pingaaruteqarluartoq, tamannalu aningaasarsiornitsinnut iluaqautaasussaassalluni, Nickie Isaksen oqarpoq.
Isaksen Design Kalaallit Illuannut qanilaartuuvoq, Nickie Isaksenip anaanaa Rita Isaksen oqarpoq:
- Kalaallit Illuat uangutsinnut pingaaruteqartupilussuuvoq, tassami kulturitsinnut atasupilussuummat. Taamaattumik ukiut tamaasa maaniittalerpugut, tamatumalu pilersippaa Kalaallit Illuannut attaveqarlualersimagatta, Rita Isaksen oqarpoq.
Kalaallit Nunaannut attuumassutilinnik filmiliortartoq, Ivalo Frank aamma takutitsisunut ilaavoq, takutillugu Echoes:
- Kalaallit Illuat pulaarlugu nuannareqaara. Filmi takutikkakku iluatsilluarpoq, inuppassuarnik takuneqarami aammalu oqallisigigaatsiarneqarluni, Ivalo Frank oqarpoq.