Unnuk kulturisiorfik peqataaffigineqarluarpoq

Unnuk kulturisiorfik Nuummi ippassaq ingerlanneqarmat sila atoruminarpallaanngikkaluaq inuppassuit peqataapput. Hans Egedep oqaluffiata eqqaaniit Katuap tungaanut Ikumatitalisarluni ingerlaartoqarpoq, Katuamilu suliffeqarfiit peqatigiiffiillu assigiinngitsut arlallit takutitsineranni inuppassuit isersimapput.

Nuullu borgmesteriata Agnethe Davidsenip unnuk kulturisiorfik ammaannaqaa.

Unnuk kulturisiorfimmi Katuami assigiinngitsunik nalunaaqutaq qulit tungaanut aaqqissuussisoqarpoq, ilaatigullu qilaatersortartoq Egon Sikivat inngerut ukiut 1000-t arlallit pisoqaassusilik tusartippaa.

Nuummi suliffeqarfiit peqatigiiffiillu assigiinngitsut 48-t nittaatsukasiugaa inunnit ornigarneqaqattaarput, Nuullu Bussii akeqanngitsumik angallassippput.

Nuummi politeeqarfik inunnit 1000-t missaaniittunit pulaarneqarpoq, meeqqallu isertitsiviit takugamikkik isumaqarput isertitsivimiittartut naakkinassaqisut. Nunatta atuaageqarfiani meeqqat natermut issaasimapput, angakkuartuusaartoqarporlu.

Suliffeqarfinnut allanut alakkaareerluta Katuamut uteqqikkatta Arnat peqatigiit suliarpassuinik takutitsinermi inuppassuit suli ussassimapput. Arnat kalaallisuuisa atortortuinik kusaginnittut arlallit radioaviisimit oqaloqatigineqartut uggoraat, kalaallisuunut tunngasunik pisiniarfeqanngimmat. Uggorinnittut ilagaat Nuka Geisler, oqarporlu

arnat kalaallisuui taama ullutsinni pingaaruteqartigisut pisiniarfeqartariaqarsoraa.

Arnat Peqatigiinneersoq Utilie Heilmann oqarpoq, Sisimiuni arnat ilinniarfiat ukiarumiit aallartittumik, inuussuttut kalaallisuuliornermik taakkualu tuniniarneqartarnerannik ilinniartitsisoqalissasoq.

Unnuk kulturisiorfimmi qilaatersortup Egon Sikivap inngerut atukkani nammineq isummani malillugu isumaqarpoq nunarput inoqanngikkallarmat Chuckoktami inoqarfinni inngerutaasarsimasoq.

Sisimiuni Qasigiannguani Ilulissanilu unnuk kulturisiorfik aamma ingerlanneqarpoq.