Unnuarissat Sisimiuni aallartinneqarput

Unnuarissat Sisimiuni immikkoortortaqalernerisigut inuusuttut illoqarfimmi unnukkut isumannaannerusumik aneersinnaalerput. Immikkoortortaq sapaatit-akunnerata naanerani aallartinneqarpoq, arfininngormallu unnukkut siullerpaamik aqqusinermi angalapput.
Allattoq Peter Troelsen, Simon Uldum
januaarip 22-at 2014 03:30

Pilersitsiviusumik ataatsimiittoqarnerani Nuummit tikeraanik peqataasoqarpoq, suleqatigiinnillu pitsaasumik katersuutitsinissaq siunertarerpiarlugu Danmarkimit ilitsersuisussamik aamma tikisitsisoqarsimalluni. Innuttaasunik ataatsimiisitsisoqarpoq, tassanilu aalajangerneqarpoq inuit qulingiluat ilaasortaaffigisaannik aqutsisoqatigiinnik pilersitsisoqassasoq.

Unnuarissat arfininngormat unnukkut aqqusinermi angalaaqqaarput, Unnuarissallu aamma Sisimiuni pisariaqartinneqarnerat ingerlaannaq paasinarsivoq.

- Unnuarissat Sisimiuni pisariaqartinneqarnerat ersarittupilussuuvoq. Misiligummik ingerlaaqatigiinnermi meeqqat inuusuttullu 50-60-it missaat arfineq pingasunit qummut ukiullit unnuap-qeqqata kingorna aneertut naapippagut, Unnuarissat oqaaseqartartuat Merete Smith-Sivertsen oqarpoq.

Unnuarissani peqataanissamut soqutiginnittut tamarmik Unnuarissat Facebookimi quppernerat `Natteravnene Sisimiut´ alakkarsinnaavaat imaluunniit uunga allallutik Sisimiut@natteravnene.dk.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq