Unngiarlugulu nujaajarpaat
Apeqqut tamanna ualimut akineqarsinnaalissaaq, tassami sorsunnermi pinerluuteqarsimasunut eqqartuussivimmi Haagimiittumi ualeru sassartinneqartussaavoq. Maannali sorsunnermi pinerluuteqarsimasutut pasisaasup assingi nutaat saqqummiunneqareerput.
Radovan Karadzic umissuani qaqqoriit peerlugit unngiareerluni nujaajartereerlunilu qanoq isikkoqalersimanera assimi takuneqarsinnaavoq. Sorsunnermi pinerluuteqarsimasutut pasisaasup tigusaareernerani assit assilineqarsimapput. Serbiamilu præsidentiusimasup qanoq isikkoqarnera Serbiamiunit takorusunneqartorujussuuvoq.
- Radovan Karadzic ukiuni aqqaneq-marlunni avammut saqqummernikuunngilaq, ullumikkullu qanorpiaq isikkoqarnera ilisimaneqarani. Ukiuni taakkunani allatut ateqarluni umissuani nujarsuanilu maanna peereersimalerpai, Thomas Hjortsø DR-imeersoq oqarpoq.
Radovan Karadzic aqqanilinnik unnerluutigineqarpoq, tassa ilaatigut inuiannik toqoraasimasutut nunarsuarmioqatigiinnullu ajortuliorsimasutut, taakkununnga ilaalluni 1995-imi Srebrenicami muslimit angutitaannik nukappiarartaanillu 8.000-iusunik toqoraaneq.
