Unnerluutiginnissutit nutserneqartarneri pillugit qulaajaasoqalerpoq
2009-mi eqqartuussiviit qullersaanni aalajangikkami naqissuserneqarpoq kalaallit marluinnik oqaasillit, imminerminnut unnerluutiginninnerit kalaallisuunngortinneqarnissaannik piumasaqaateqarsinnaanngitsut.
Nunatta Eqqartuussisuunerata Søren Søndergård Hansenip aalajangerneq pillugu ugguarnini KNR-mut oqaatigaa, inatsisitigullu isumannaatsuunissaq ernummatiginerarlugu, amerlanerujartuinnartummi qallunaatut piginnaasaat eqqartuussivimmi naammanneq ajornerat misigiuaramiuk.
Maannakkullu Inuit pisinnaatitaaffii pillugit Ilisimatusarfiup Kalaallit Nunaanni inatsisitigut isumannaatsuuneq misissornialerpaa.
- Inuit pisinnaatitaaffii pillugit Ilisimatusarfik aammattaaq Kalallit Nunaanni sulisussaatitaavoq taamalillunilu inuit pisinnaatitaaffiisa atuutsinneqarnerannik aamma qulakkeerinneqataasussaalluni, tamatumalu soorunami kingunerissavaa inatsisitigut isumannaannerulerneq. Taama oqarpoq immikkoortortami pisortaq, Anders Buhelt.
Naalagaaffiit Peqatigiit inuit pisinnaatitaaffii pillugit, UPR-mik taaneqartumik qaammatip siuliani Danmark tusarniareeraalu, Kalaallit Nunaanni eqqartuussiveqanermi oqaatsit ajornartorsiutaanerat soqutigisaqaqatigiiffiit arlaqartut tikkuareeraallu tamanna pivoq. Tamannalumi ilisimatusarfik ajornartorsiut pillugu siunissami iliuuseqalissappat ilaatigut aallaavittut atorneqassaaq.
- Nalinginnaasumik periuseqartarnerput malillugu iliuuseqassaagut, tassa pisup qulaajarneqarnerani oqartussanik attuumassuteqartunik oqaloqateqarluta. Suliniutit arlaqartut aallartinneqareersimasut nalunngilarput, aammalu pineqartumut ernummateqarneq pillugu tusarniaanermut atatillugu soqutigisaqaqatigiiffiit akissuteqarsimanerat ilisimallutigu. Taamaattumilluuna pissutsit qanorpiaq ittuunerat paaseqqaarusukkipput, arlaatigut ikiorsiissutaasinnaasumik iliuuseqarnissarput aalajangertinnagu, Anders Buhelt oqarpoq.
Kalaallit Nunaanni inatsisitigut illersorneqarneq pillugu ajornartorsiuteqarnersoq taassuma suli nalilerusunngilaa, kisiannili inuit eqqartuussivimmut sassaartinneqartut unnerluussummik paasisaqarsinnaannginnerannik Nunatta Eqqartuusisuunerata oqarnera tapersiinnarsinnaallugu.
- Ajornartorsiut piviusorsiorpaluppoq, imminerminnummi unnerluussutigineqartut paasisinnaanngippatigit tamanna ernumanartuuvoq. Ajornartorsiullumi oqaaseqarfigissagaanni tamakkuupput misissortariaqakkagut, taanna oqarpoq.
Ullumikkut pissusiusut imaapput, Kalaallit Nunaanni unnerluussisussaatitaasup piumasarineqassappat unnerluussutit kalaallisuunngortissinnaallugit. Taamaaliortoqartuaannannginnerali Nunatta eqqartuussisuunerata, Søren Søndergårdip isornartorsiorsimavaa.
