Unnerluutiginninneq misissuiffigineqalerpoq
Kilisaammi raajarniummi Markusimi upernaaq ajunaartoqarnerani pissutsit naammaginanngitsut aallaavigalugit Imarsiornermik Qullersaqarfik misissuisimavoq, tamannalu aallavigalugu kilisaataatileqatigiit Qajaq Trawl qaammat kingulleq politinut unnerluutigineqarluni.
Unnerluussutip tusarfigineqaqqinnginnera Kalaallit Nunaanni Politeeqarfimmit suliarineqannginneranik isumaqanngilaq.
- Maanna Imarsiornermik Qullersaqarfimmit nalunaarusiamik pivugut, taanna soorunami atuassavarput, kisiannili aamma nammineq paasiniaassaagut, paasisagullu aallaavigalugit suliaq qanoq ingerlaqqissanersoq aalajangissallugu, vicepolitimesteri Morten Nielsen nassuiaavoq.
Kilisaataatileqatigiit ataasiaannarlutik unioqqutitsinatik, isumannaallisaanermulli inatsisinik arlalinnik unioqqutitsisimanerat, Imarsiornermik Qullersaqarfiup annertuumik unnerluutiginnissimanerminut nassuiaatigaa.
Kalaallit Nunaannilu Politeeqarfiup unnerluussut aamma taama paasisimavaa.
- Uppernarsarsinnaavara qanoq iliorsimanernut assigiinngitsunut unnerluutiginnittoqarsimammat tamannalu politiit maanna namminneerlutik misissussavaat, Vicepolitimesteri Morten Nielsen oqarpoq.
Vicepolitimesterip ilimagaa misissuineq decembarip qeqqata tungaanut ingerlanneqassasoq, misissuisoqareerpallu qanoq suliaq ingerlaqqissanersoq aalajangiiffigineqarumaartoq. Akiligassiinermik unnerluussummilluunniit eqqartuussiviup suliassaanik allagaqarnermik kinguneqarsinnaavoq.
