Unnerluutigineqartut tamarmik pisuutinneqarput
18-nik ukiulimmut Ghazala Khan-imut uianullu toqutseriarnermi eqqartuussinermi unnerluutigineqartut qulingiluat tamarmik akunnialunnguit qaangiummata pisuutinneqarput.
Arnaq inuusuttunnguaq Slagelse-mi qimuttuitsut unittarfianni siorna septemberip 23-ianni aqqalussaminit aallaaneqarluni toqutaavoq, ilaqutaalu tamarluinnarmik toqutsinermut pisooqataasutut pisuutinneqarput.
Eqqartuussineq immikkuullarissuuvoq, nikasaallunimi toqutsinermik taaneqartartuni, toqutsisoq kisiat pisuutinnagu, toqutsinissamulli pilersaarusioqataasut tamarmik oqaluttuarisaanermi aatsaat pisuutinneqarmata.
-Eqqartuussinermi unnerluussisut toqutsinermut uppernarsaatinik arlalissuarnik peqarsimapput, eqqartuussivimmilu aalajangersaaqataasut eqqartuussisuunerup oqaasia taamaalillutik tusaasimavaat, tassa toqutsineq piareersarneqareerluni toqutsinerusoq arlalinnillu uppernarsaateqartoq, tusagassiortoq Lene Kogi eqqartuussivimmit ilanngutassiilluni oqarpoq.
Eqqartuussinermi unillatsiartoqareerpat unnerluutigineqartut qulingiluat qanoq pillaatisinneqassanersut aalajangerneqassaaq, pillaanerlu suliareqqitassanngortinneqarsinnaanngilaq.
