Unnerluutigineqartup nassuiaataa saqisumit akerlilerneqarpoq

Birna Brjánsdóttirip toqutaaneranut eqqartuussinerup pingajuat ullaaq manna aallartippoq.

Islandimi imerniartarfimmi saqisup oqaluttuaraa, pasisaalluni tigummigallagaasimagaluartoq unnuk taanna ikinngutigillualersimagini.

Visir.is taama allaaserisaqarpoq.

Saqisoq naapertorlugu, pasisaalluni tigummigallagaasimasoq imerniartarfimmut unnuap qeqqanngitsoq isersimavoq. Kisimiilluni sivisuumik issiavoq imigassartorpallaarsimagamilu aalakoorsimaqaaq.

Taamaakkaluartoq angut taanna pitsaaqalunilu inussiarnisaaqisoq, saqisup unnersiutigaa.

Taava unnerluutigineqartoq tullinnguulluni unnuap qeqqata kingorna iserpoq imigassanillu pisilluni.

AAMMA ATUARUK Unnerluutigineqartup nassuiaatini eqqartuussivimmi allanngortikkaa

Unnerluutigineqartup aggustip 21-ani eqqartuussinermi nammineq oqaluttuani saqqummiukkamiuk inuttaqatini tikkuarpaa, oqarluni taanna imerniartarfimmi arnanut qaninngoorsimaqisoq.

Taamatulli oqarsimanera saqisup eqqunnginnerarpaa:

- Pasisaasimagaluartoq taamaatut pissuseqarnikuunngilaq. Uannut oqalukkumasarpoq. Arnat saniminiittut immiaarallerfigisarpai kisiannili iluamik oqaluutissanagit, saqisoq eqqartuussivimmi nassuiaavoq.

Saqisup ilanngullugu nassuiaatigaa unnerluutigineqartoq imigassartorpiarsimanngitsoq pasisaasimagaluartorlu sinilersimasoq.

Angutit kalaallit taakku marluk imerniartarfik matummat aneqquneqarsimapput.

Eqqartuussinermi aalajangiinissaq sapaatit akunneri sisamat qaangiuppata pissaaq.