Sapaammi februaarip ulluisa 16-ianni eqqartuussaassangatinneqarpoq.Assi: Simon Uldum

Unnerluussut: Angut niviarsiaqqamut ukiukitsumut pinngitsaaliisarsimaneragaasoq

Angut 28-nik ukiulik 2014-ip 2019-illu akornanni pisut katillugit 23-t pillugit piffissami killiligaanngitsumi tigummigallarneqassasoq, unnerluussisussaatitaasut piumasaraat.

Angut 28-nik ukiulik niviarsiaqqamut ukiukitsumut pinngitsaaliisarsimasutut, arlaleriarluni nakuusersimasutut sioorasaarisimasutullu kiisalu hashimik tigummiaqarsimasutut unnerluutigineqartoq pillugu suliaq angisooq Eqqartuussisoqarfik Sermersuumi suliarineqarpoq.

Angut taanna ingammik 2016-ip 2019-imilu maajip akornanni pisunut 23-nut unnerluutigineqarpoq, 2014-imili nakuusersimasutut aamma unnerluutigineqarluni.

Niviarsiaqqamut ukiukitsumut qaammatit qulit ingerlanneranni, tassa 2016-imi novembarip qaammataaniit 2017-imi septemberip qaammataa ilanngullugu, peqqarniitsuliorluni kisissaanngitsunik pinngitsaaliisarsimasutut unnerluutigineqarpoq.

Angutip taassuma niviarsiaraq ukiukitsoq ilaatigut pinngitsaalisarsimavaa - niviarsiaqqamillu ilaqutaanillu toqutsinissamik sioorasaaruteqartarsimalluni. Angutip niviarsiaqqamut pinngitsaaliinermini niviarsiaqqap kiinaatigut persuttarlugulu arlaleriarluni ilisimajunnaarutaanik akitsimik assersortarsimavaa.

Qasseeriarluni nakuusertarneragaallunilu sioorasaarisarneragaasoq

Angut taanna katillugit arfinileriarluni nakuusersimasutut unnerluutigineqarpoq, ilaatigut niviarsiaqqamik kussiamut nakkartitsilluni ajatsisimaneragaalluni, niviarsiaqqap seeqquata naffassiutaanik. Niviarsiaraq tamatuma kingorna seeqqumigut suliarititussanngorami napparsimmavimmut unitsinneqarpoq.

Angut taanna Aasianni, Nuummi Sisimiunilu pineqaatinneqarsimasunut inissiisarfinniitsitaareernikuuvoq, Sisimiuniinnerminilu pinerluuteqarsimasut inissiisarfimmi nakkutilliisut ilaata uppataatigut kiisisimaneragaalluni.

Unnerluussisussaatitaasut oqarnerat naapertorlugu nakkutilliisunut ataasiaannarani nakuusersimavoq.

Angut taanna politiinit 2018-imi septembarip qaammataani tigusarineqarami politiit ilaat toqqusassisimagaa, qasilitsumillu qulliliornartumik politiimit aatsaat serparneqarami toqqusassitani iperarsimagaa, unnerluussisussaatitaasut oqarput.

Tigusaareerami Aasianni pinerluuteqarsimasunut inissiisarfimmiinnermini nakkutilliisut marluk sioorasaarlugit nuliai paniilu tulliani qimaaguni pinngitsaalissaqqaarlugit oqarsimaneragaavoq.

Allakkami unnerluussummi allassimasut naapertorlugit pisuni 23-usuni aqqanillit sioorasaarinermut toqutsinissamillu sioorasaarinermut tunngapput. Niviarsiaqqap ukiukitsup tamataqanngitsup assingisa ilaannik siammarterinissamik 2019-sioorasaarisimasoq ilaatigut allassimavoq, 2019-illu aallartinnerani taamaaliorsimalluni.

2016-imilu novembarip qaammataani festeqatiminut ima oqarluni sioorasaarisimaneragaavoq: ”Qoorortoora aariarlugu tamassi toqussavassi”.

Angut taanna hashimik arlaleriarluni tigummiaqarsimasutut aamma unnerluutigineqarpoq, 1400 koruunillu, hashimik tuniniaanikkut iluanaarutaasimaneragaasut, inuttaanit 2017-imi septembarip qaammataani arsaarinnissutigineqarlutik.

Unnerluussisussaatitaasut angut taanna 28-nik ukiuliusoq taassumunnga unnerluussuterpaaluit taassumalu peqqarniitsuliorlunilu unioqqutitsineri tunngavigalugit pinerluuteqarsimasunut piffissami killiligaanngitsumi inissiisarfimmiititanngortinneqassasoq piumasaraat.

28-nik ukiullip unnerluusutit amerlanersaattut pisoqarsimannginnerarpaa, ilaannulli nassuerluni - ilaatigut hashimik tigumiagaqarsimanermut tunngasut, siorasaarisimaneragaanerit ataasiakkaat taavalu politiinik persutaasimaneraanermut ilaatigut nassuerluni.

Sapaammi februaarip ulluisa 16-ianni eqqartuussaassangatinneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat