Unnerluussisup unioqqutitsisut millioninik pillaatitut akileeqquai
Sanaartornermik suliallit pingasut, B.J. Enterprise, Permagreen Grønland aamma Kang-Total-Byg qanoq pineqaatissinneqassanersut oqaluuserineqarmat unnerluutiginnittoq sukataaqaaq.
- Maani nunami unammilleqatigiinnissamut inatsisit unioqqutinneqartarnissaat imminut akilersinnaasariaqanngilaq, unnerluutiginnittoq eqqartuussinerup nalaani taama oqarpoq, eqqartuunneqartullu pingasut aningaasanik millionilikkaanik akiliisinneqarnissaat piumasaralugu.
Eqqartuunneqartut pineqaatissinneqassagunik annerpaamik akiligassinneqartussaq tassaavoq B.J. Enterprise, 3,9 millionit koruuninik akiliisinneqartussanngussagami.
Permagreen Grønland aamma Kang-Total-Byg pineqaatissinneqassagunik assigiimmik akiliisussanngussapput, tassa 1,7 millionit koruuninik akiliisitaasussanngussagamik.
Tamatuma saniatigut pisortat pingasut immikkut 25.000 koruuninik akiliisinneqarnissaat unnerluutiginnittup piumasaraa.
Sanaartugassat peqquserlulluni isumaqatigiissutigineqartut sisamaapput, taakkulu 2008-mi 2009-milu pisimallutik. Kangerlussuarmi angalasut aqqusaartarfiat nutaaq 17 millionit koruuninik nalilik suliarineqartuni akisunersaavoq, unnerluussissutigineqartullu tamarmik katillugit 20 millionit koruunit missaannik naleqarput.
Unnerluutigineqartuni Kang-Total-Byg-imi pisortaq Jørgen Dresler Mortensen kisiartaalluni pinngitsuunerarpoq, taassumalu pinngitsuutitaanissaa illersuisuata piumasaralugu.
Eqqartuunneqartulli ilaat pinngitsuutinneqassasut unnerluutiginnittup ullumi nalunaarutigaa.
Imaanngilaq unnerluutigineqartut pinerluuteqarsimanngitsut, tassami unnerluutigineqartut ilaat suliamut tunngatillugu ikiuussimariarmata pinerluutigineqartut taamaalillutik eqqartuussivimmit sukumiisumik paasineqarsinnaasimapput, taamaalillutillu pinngitsuutitaanissaannut periarfissaqartilerlugit.
Permagreenip, B.J. Enterprisellu illersuisui sullitatik sinnerlugit pisuunerareerput, pineqaatissiissutitulli akiliutigineqartussat appartinneqangaatsiarnissaat piumasarisimallugu.
Sanaartornermik suliallit unnerluutigineqartut qanoq pineqaatissinneqassanersut tassa eqqartuussisup maanna aaliangertussanngorpaa, qaquguli tamanna pissanersoq suli ullulerneqanngilaq.
