Unioqqutitsisutut nalilerpaat

Nunatta avataanit imaluunnit sineriatsinnit tikisillugit suliartortitat illusissagaluarunik imaluunnit piginneqatigiilluni illuutileqatigiinnut ilanngutissagaluarunik, siunissami angerlarnissartik namminneq akilertalernissaannik, Namminersornerullutik Oqartussat isumaqatigiinniartartuisa Ilinniagartuut Kattuffiannut nalunaarutigisimasaat pillugu oqallinnermut ilinniartitsisut kattuffiat IMAK maanna akuliuppoq.

- Isumaqatigiinniartarfik isumaqatigiissutinik unioqqutitsivoq, isumaqatigiissutimmi illuatungeriilluni aatsaat allanngortinneqarsinnaapput. IMAK-p siulittaasua Sivso Dorph oqarpoq.

- Isumaqatigiinniartarfiup isumaqatigiissutit qanoq paasineqarsinnaanerannik kisimiilluni aalajangersaasinnaanngilaq, illuatungeriit paaseqatigiissinnaanngikkaangamik isumaqatigiinngissutaasoq pillugu isumaqatigiinniaqqaartussaapput. Taamaattumik isumaqatigiinniartarfiup matumani iliuuserisimasaa pissusissamisuunngimmat akuerineqarsinnaanngilaq. Sivso Dorph erseqqissaavoq.

IMAK-imi ilaasortat 1.200-it missaanniipput, ilaasortanillu imaluunnit Namminersornerullutik Oqartussat isumaqatigiinniartarfiannit saaffiginnittoqarsimanngikkaluartoq, saaffiginnittoqassagaluarpat, isumaqatigiissutit qanoq paasineqarsinnaanerannik isumaqatigiinniarnissaq tullinnguuttariaqassasoq siulittaasoq erseqqissaavoq.

- Suliassarput siulleq tassaassaaq, isumaqatigiinniartarfimmut saaffiginninnissarput. Isumaqatigiissutillu isumaasa qanoq paasineqarsinnaanerat pillugu isumaqatigiissinnaanngikkutta saqitsaannermi isumaqatigiissitsiniaasussamik aggersaanissaq tullinnguuttussaassaaq. Sivso Dorph erseqqissaavoq.

Namminersornerullutik Oqartussat isumaqatigiinniartartui isumaqatigiissutinik unioqqutitsinerarlugit Ilinniagartuut Kattuffiata oqariartuutigisaanut, Atorfillit Kattuffiat aamma tapersiissuteqarpoq.

- Isumaqatigiissut isumaqatigiissutaavoq, isumaqatigiinniartarfiullu siullerpaalluni tamanna ilisimasariaqaluarpaa. Atorfillit Kattuffianni siulittaasoq Erik Hammeken erseqqissaavoq.

Isumaqatigiinniartarfimmit sapaatip-akunnerata kingulliup naanera tamaat atorlugu oqaaseqartitsiniaraluaratta iluatsitsinngilavut.