Unioqqutitsisoqannginnerarpaat

Qilalukkat tuugaavi 13-it pequtit akornannut ilillugit Danmarkimut eqqunneqarnerat unioqqutitsinerunngilaq, taama oqarput, danskit Pinngortitamut Qullersaqarfiat, Skov og Naturstyrelsen.

TV-qarfiup TV2-p aallakaatitassiaani Pinerluttunik Ujaasinermi KNR TV-kkut ippassaq aallakaatinneqartumi takutinneqarpoq, Ålborgimi ilaanngaaserisut Kalaallit Nunaaniit pisattanik nassiussanik misissuinerminni, qilalukkat tuugaavinik 13-inik nassaartut.

Danskit Pinngortitamut qullersaqarfiata, Skov og Naturstyrelsep, unioqqutitsisoqannginneranik oqarnerat aallaavigalugu qilalukkat tuugaavi 13-it piginnittumut utertinneqarput. Namminersornerullutik Oqartussani avatangiisinut pinngortitamullu pisortaqarfia, qilalukkat tuugaavisa Danmarkimut eqqunneqarnerat pillugu misissuipput. Ellen Chemnitz Avatangiisinut pinngortitamullu pisortaqarfimmi, uumasut Kalaalit Nunaannit anninneqarsinnaanerannut qinnuteqarfimmi isumaginnittoq, oqaaseqartinniaraluaratsigu, pineqartoq suliarineqarmat oqaaseqarusussimanngilaq.