Unioqqutitsinertalimmik saqqummersitsisoqaleraluartoq

Sanalukkat aarrit tuugaanneersut USA-mut eqqunneqaqqusaanngimmata, sapaatip akunnerata tulliani Washingtonimi nittarsaassinissarsuarmi saqqummersitsinissaq, USA-p oqartussaasuinit unitsinniarneqarsimagaluarpoq.

Saqqummersitsinissap unitsinniarneqarsimagaluarneranut pissutaavoq CITES-imi malittarisassanik nunatta unioqqutitsisimanera, tassa nunat tamat akornanni uumasunik nungutaalersunik illersuiniarluni niueqateqaqqusinnginnermut malittarisassat matumani pineqarlutik.

2002-mi Bruxellesimi Europamilu illoqarfinni allani akornutissarsiffiunngitsumik saqqummersitsisoqarpoq, EU-mi taamaattunik aalajangersagaqanngimmat.

Kalaallit Danmarkimi aallartitaqarfiannit nassuerutigineqarpoq, aarrit tuugaavi atorlugit sanalukkat USA-mi saqqummersitassanut ilanngunneqarsimanerat kukkuluttornerusoq.

Saqqummersitsineq ”Festival of Greenland”-imik taaguuteqarpoq, katersugaasiverujussuarmilu Smithsonian Institutionimi ulluni pingasuni ingerlanneqassalluni.

Ulluni taakkunani Namminersornerullutik Oqartussat aamma danskit kiisalu USAp naalakkersuisuisa sinniisaat ataatsimiissapput, ataatsimiisitaliami Joint Commiteemi ilaasortat ataatsimiissammata.

Kalaallit Washingtonimi nittarsaassineranni Danmarkimi ministeriuneq, Anders Fogh Rasmussen, USA-p præsidentianik ataatsimeeqateqariartorluni USA-mut tikeraassaaq.