Unioqqutitsineq suli silaannarmiippoq!

- Ilumoorpoq suliassaq uanga tigunikuuara, ingerlateqqissinnaangilarali tusarniutigineqarsimanngitsoq Naalakkersuisunut suliassatut apuunneqarsinnaanngimmat, Aalisarnermut Naalakkersuisoq Hans Enoksen oqarpoq.

Taanna oqarpoq, Aalisarnermut Pisortaqarfik nammineerluni raajarniarnemut tunngasunik suliaqartitsereersimasoq.

Hans Enoksen aperaarput nalunaarusiaq apriilimili suliarineqarsimagaluartoq sooq massakkumut iliuuseqarfigineqarsimannginnersoq.

- Naalakkersuisut taassuminnga nalunaarusiamik suliaqartoqarsimaneranik ilisimatinneqarsimanngimmata tamanna akisinnaanngilara, oqarpoq.

Apereqqipparput, ullumi radio aviisimi Lars Fly oqarsimasoq Aalisarnermut Pisortaqarfimmut 2002-imili ajornartorsiummik tamatuminnga ilisimatitsiuartarsimagaluarlutik akissuteqarfigineqanngisimanngimmata suliassat uninngatinneqartarsimanersut.

- Oqaasiinnartigut apuunneqartarsimapput, kisitsisillu uppernarsaatit ilanngunneqartarsimanngillat. Aalisarnermullu pisortaqarfik tunngavissaqanngitsumik malersuisinnaanngilaq. Unioqqutitsisoqartarsimappallu tamanna politiit suliassaraat, Hans Enoksen oqarpoq.

Apereqqipparput nalunaarusiap isertuussaasimanera nalunngisaqarfigineraa.

- Sooq isertuussisoqarsimanersoq ilisimanngilluinnarpara, immaqa inuit apersorneqarsimasut kissaateqarsimasinnaapput tamanna isertuunneqaqqullugu, Hans Enoksen oqarpoq.

Taassuma isertuussinermik ilisimasaqannginnera tupigerpasillugu aperaarput, nammineq Namminersorneq pillugu Pisortaqarfimmut Naalakkersuisuulluni sooq tamanna ilisimasaqarfiginngissinnaaneraa.

- Uanga sioqqullungali Naalakkersuisoqarfik taanna allamik Naalakkersuisoqarpoq, taassumalu Naalakkersuisup suliaritissimavaa uanga sioqqullunga naammassineqartoq, oqarpoq.

Apereqqipparput oqimaanaarisarnermik suliassat nalunngisaqarfigilluarnerai.

- Ukiorpassuarni ilisimaaraarput, massakkullu aaqqiissuteqartoqareernikuuvoq, sulilu allanik aamma suliniuteqartoqarpoq.

- soormi ukiorpassuarni ilisimasimagussiuk qangali iliuuseqarfigisimanngikkissi? Oorerpassuarnimmi naleqarpoq??, aperaarput.

- Ukiorpassuarni nalunngereerparput, aamma qularinngilara inuiaqatigiit tamarmik ilisimaarigaat, Hans Enoksen oqarpoq.