Unioqqutitsillutik nannuttut akiliisitaapput
Angutit sisamat siornaak kujataani nigaqqaariarlugu nannumik unioqqutitsillutik pisaqartut, eqqartuussisutigut suliarineqarnerat ullumi naammassineqarpoq . Nunatta eqqartuussiviani eqqartuussinermi angutit sisamat tamarmik 3.000,00 koruuninik akiliisussanngortinneqarput, februaarimi kredsret-imi pineqaatissiisutigineqartoq atuuttussanngortinneqarluni. Angut nannumik aallaannittoq kredsrette-mi eqqartuunneqarnermini 5.000,00 koruuninik akiliisussanngortinneqaraluarpoq, qoorortuuaqqamik nanoq aallaasimammagu, qorortuumik aallaasussaagaluarlugu.
Piniartut februaarip qaammataani kredsrette-mi eqqartuunneqaramik pineqaatissinneqarnertik akuerisimagaluarpaat, pingajuatali nunatta eqqartuussivianut suliaq ingerlateqqippaa, ullumilu tassa nunatta eqqartuussiviani eqqartuussineq naammassineqarpoq.
Nunatta eqqartuussiviani eqqartuussinermi, uummasut illersorneqarnissaannut inatsit malinneqarpoq, tassa uumasut nujuartat pinngortitamiittut uumatillugit tigusarineqaqqusaanngimmata – inuusuttullu akiligassaat 3000 koruuniusoq naqissuserneqarpoq.
Inuusuttullu ilaat ataaseq nannup kukiinik arsaarneqarpoq.
Taamaalilluni kujataani uumasumik nannunniarneq pillugu oqaluttuaq tamaanga killeqarpoq, eqqartuussivinnut qaffasinnerusunut ingerlateqqinnissaa periarfissaqanngimmat.
