Unioqqutitsillutik piniartut pingasut løvenit nerineqartut
Unioqqutitsillutik piniartutut pasineqartut ikinnerpaamik pingasut Sibuyami løvenit toqunneqarlutillu nerineqarput.
Nunamik inunnik akornusersuiffioqqusaanngitsumi piginnittup Nick Foxip piniartut siissisumik ujaasinerminni løverpassuit ataatsimoortut naapissimassagaat ilimagaa.
Taakkuli qasserpiaanersut oqaatigisinnaanngilai, amiilaarnartumilli pisoqarsimavoq.
- Løverpassuit ataatsimoortut akornannukarsimapput. Amerlangaatsiarmatalu piffissaasuasimassaqaat, Nick Fox oqarpoq.
- Qassiorpiarneri qulakkiinngilarput, amiakkoqarpallaanngillammi. Kisianni atisat nassaarineqartut inunnit pingasuneerpasipput, oqarpoq nangillunilu oqaatigalugu taama pisoqarneranik siusinnerusukkuttusagaqarnikuusimanani.
Paasissutissat naapertorlugit unioqqutitsillutik piniartut qoorortuunik sakkortuunik aallaaseqartut ulimaataqartullu, ataasinngornermi ullaaralaakkut Sibuyami nunamut inunnit akornusersuiffioqqusaanngitsumukarput.
Toqutaasut amiakkui aqaguani nassaarineqarput.
Politiit toqusunik misissuisartui toqutaasut amiakkuinik misissugassaminnik aallerlutik løvet saassussiffiannukarput.