Unioqqutitsilluni saarullinniarneq unitsinniarpaat
Barentip Imartaani, Ruslandip Norgillu avannaaniittumi, inatsisinik unioqqutitsilluni nakkutigineqanngitsumillu saarullinniarneq qanoq ililluni unitsinneqassava? Aamma Irmingerip Imartaani, Nunatta Islandillu kujataaniittumi, suluppaakkat nungungajallugit aalisarneq qanoq iliuuseqarfigineqarsinnaava?
Apeqqutit taakku marluk pingaarnerpaassapput, aalisarnermut ministerit Atlantikup avannaaneersut Narsami pingasunngorpamiit tallimanngorneq ilanngullugu ataatsimeersualerpata.
Inatsisinik unioqqutitsilluni, nalunaarsuinertaqanngitsumik nakkutigineqanngitsumillu nunat tamalaat imartaanni aalisarneq, aalisakkanut navianartorsiortitaasutut isigineqartoq, ataatsimeersuarnermi qulequtaassaaq.
Ataatsimeersuarnermi, persuarsiorfiusussaanngitsumi, aalisarnermut ministerit maannamut iliuusaasimasut nalilersussavat, qanorlu sukaterisoqarsinnaanersoq oqaluuserissallugu.
Aalisarnermut naalakkersuisup, Finn Karlsenip, ataatsimeersuartuni aggersaasuusup, saniatigut, Canada-mi, Norgemi, Savalimmiuni, Islandimi Ruslandimilu aalisarnermut ministerit peqataassapput, soorluttaaq EU aallartitaqassasoq.
