Unioqqutitsilluni nannuttoqarpoq

Kangerluarsuk Ungallermi Sisimiut avannaatungaaniittumi angutit marluk sapaammi marsip 20-ani nannupput, kisianni unioqqutitsineruvoq aallaat atorneqartoq qoorortuuaraammat qamuteralaallu angallatigineqarsimammata.
marsip 23-at 2011 07:56

Sisimiuni politiit ataasinngormat marsip 21-ani angutit marluk, unioqqutititsillutik nannunniarsimanerat pillugu, tigusaraat.

Angutit taakku marluk qamuteralaat qamutinik kalitallit atorlugit Sisimiut avannaani Kangerluarsuk Ungalleq ornissimavaa, tassanilu nanoq aallaat 22 magnum atorlugu pisarisimallugu.

Angutit marluk nunami motoorimik angallatilinnik asuli angallavigeqqusaanngitsumi - tassa inatsisartut pinngortitamik illersuinissaq pillugu aalajangersagaat malillugu, soorlu snescooterit atorlugit pinngortitami angallavigeqqusaasup0 avatanni - qamuteralannik angalaarsimapput.

Sisimiuni politiit nanoq pisaq aamma snescooterit aallaallu ilanngullugit tiguaat, kingusinnerusukkut arsaarinnissutigineqarnissaat piumasarineqassammat.

Nannunik illersuineq piniarnerlu pillugit nalunaarut nr. 21, 22. september 2005-imeersoq ilaatigut snescooterit nannunniarnermi atorneqannginnissaanik aamma aallaat nannunniarnermi atorneqartoq minnerpaamik kaliber 30.06-issasumik aalajangersagaqarpoq.

Piniartut marljuk taakku aningaatsiartumik akiligassinneqarnissartik aamma arsaagaanissartik ilimagisinnaagaat, Johan Davidsen, Poliit Sisimiuni nunap immikkoortuani pisortaat oqarpoq.

Angutit nannuttut aappaa piniartutut allagartaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq