Unioqqutitsilluni isumaqatigiittoqartarnera politiinit uppernarsineqarpoq
Sanaartugassanik suliaqartut akornanni sulisut arlaat suleqatiminik oqaatilliisimappat mamarliisimappalluunniit, politiillu ilisimanngisaannik pinerlussimanertik nassuerutigisimagu, sakkortuvallaanngitsumik pineqaatissinneqartalissapput. Periuserlu nutaaq taanna iluatsittoq, avisimi Børsenimi allaaserineqarpoq.
Nuummi Sisimiunilu sanaartugassanik suliaqartartut sapaatip akunnerisa marluk matuma siorna politiit misissuivigigamikkik, suliffeqarfiit pingasut suliariumannittussarsiuussisimasut nalunnginneqartut paasisimavaat.
Misissueqqissaarnerup nalaanili politiit ilisimatitsissutigaat oqaatilliineq mamarliinerluunniit pineqaatissiissummik sakkukinnermik kinguneqarsinnaasoq, taamaalimmallu misissuineq sukkatsippoq, naalagaaffimmi eqqartuussissuserisup tullersortaa, Hans Jakob Folker, oqarpoq.
- Paasisavut arlaqarput, sulilu amerlanernik nassaarnissarput ilimagaarput, Hans Jakob Folker oqarpoq.
Sanaartugassanik suliaqartartut ilisimanngisaannik båndimut immiunneqarsimapput, taamaalillunilu suliassatik agguataartaraat paasineqarluni, politiillu misissueqqissaartartuisa misissuinitik taamaalillutik aallartissimallugit.
