Unioqqutitsilluni aalisarneq pimoorullugu akiorniarneqalerpoq
Suliffeqarfissuit assigisaasalu unioqqutitsilluni aalisarneq aqqutigalugu aningaasarsiupilunnerat maanna sakkortuumik iliuuseqarfigineqarnialerput.
Nunarsuaq tamakkerlugu peqataaffigineqartumik Norgemi ataatsimeersuartoqarnerani, unioqqutitsilluni, nalunaarsorneqanngitsumik aaqqissugaanngitsumillu aalisartarneq sukannernerusumik akiorniassallugu nunat arlallit piareersimaffigaat. Eqiinganeruneq, imaani misissuilluarneruneq, assartuineq usilersoqqittarnerlu, aamma tulaassinermi, aalisakkerinermi aalisakkanillu tunisinermi annertunerusumik misissuisarnissaq sakkuginiarneqarput.
Aalisarnermut nunarsuaq tamakkerlugu saqqummersitsinersuaq, Nor-Fishing, Norgemi Tronheimimi pisortatigoortumik ammarneqarmat unioqqutitsilluni aalisartarnerup akiorniarneqarnissaa naalagaaffinnit arfineq-pingasunit ministerit naalagaaffimmilu atorfillit taavalu EU-milu Ataatsimiititaliarsuarmit sinniisup ataatsip akuersissutigaat.
Nalunaarusiani saqqummeqqammersuni takuneqarsinnaavoq, aningaasat unioqqutitsilluni aalisarnermit nunarsuaq tamakkerlugu isertinneqartartut 24 milliardi koruunit 56 milliardi koruunillu akornanniittut.
