Unicef: Tasiilaq pillugu nalunaarusiap nunatsinni paasissutissat amigarnerat ersersippaa
Meeqqat inuusuttullu kinguaassiutitigut pinerluuteqarfigineqartarnerat pillugu
nalunaarusiaq atuarlugu nuanninngilaq paasissutissalli suliniuteqarnissamut pisariaqarput, UNICEF-ip Kalaallit Nunaanni allaffiani suliniutinut pisortaq Sara Olsvig oqarpoq.
- Ajoraluartumik kisitsisip qaffasinnera taanna immini nutaarsiassaanngilaq. Kisianni aamma takutippaa nunatta kangiani immikkut suliniuteqartoqartariaqarnera qanoq pingaaruteqartiginersoq.
Paasissutissat nunami tamarmi amigaataasut
Isumaqarputit paasissutissanik ilisimasanik pisariaqartitsisoqartoq. Tamannaana qanoq isumaqartikkit.
- Kingumut qiviarluta takusinnaanngilarput suliniutit periutsillu atorneqarsimasut ilumut iluaqutaasimanersut, taamaammat uagut kaammattuutigaarput imatut kisitsisitalerlugu nalunaarsuisarnissaq, maannakkuminngaanniit sukumiisumik suliarineqartuaannartalerli.
Paasissutissat massakkut pigeriikkat naammanngillat?
- Tassa nalunaarusiarparujussuit misissuinerparujussuillu pigivagut aap, kisianni nunatsinni iluatsinngitsuugaq ukiuni kingullerni tassaavoq kisitsisitigut paasiniaanikkut malinnaavigiumallugu ilumut suliniutit nalunaarusianilu allani aamma suliareqqusat sunniuteqartumik ingerlanneqartarsimanersut. Taannalu iluatsinngippat taava ilisimalinngitsuussavarput – suliniutaasut ajunngitsutut isikkoqarsinnaagaluartut ilumut sunniuteqarnersut iluaqutaanersullu.
AAMMA ATUARUK Tasiilami meeqqanut inuusuttunullu kinguaassiutitigut pinerlinnerit pillugit unnerluutiginninnerpassuit
- Soorunami Kalaallit Nunaata Naalagaaffiit Peqatigiinni meeqqat pisinnaatitaaffii pillugit isumaqatigiissummi misilitsinnera 2017-imi pisoq tunngavigaarput, tassanimi meeqqat pisinnaatitaaffii pillugit ataatsimiititaliap inassuteqaataani aamma ilaavoq kisitsisitalersorlugit paasiniaanerit sukumiinerusuusariaqartut, UNICEF-ip Kalaallit Nunaanni allaffiani suliniutinut pisortaq Sara Olsvig oqarpoq
Politiit Tasiilami kinguaassiutitigut pinerluttuliornerit pillugit nalunaarusiaanni inassuteqaatit UNICEF-ip tapersersorai, Sara Olsvig aamma oqarpoq.
Tasiilami kinguaassiutitigut pinerluuteqarnerit pillugit unnerluutiginninnerit ukiut tallimat ingerlanerini 191-iupput.
Niviarsiaqqat qulinit 14-inut ukiullit pinerluuteqarfiunerpaapput, pinerliisullu 15-init 30-nut ukioqarajunnerullutik.
