UNICEF: Pingaarutilimmik angusaqarpugut

Inuit imermik minguitsumik imigassaqanngitsut 2015-imi affaannanngortinneqarnissaat anguniagaavoq, tamannali maanna anguneqareerpoq. Meeqqanut suliniaqatigiiffiup, UNICEF-ip, Naalagaaffiit Peqatigiit peqqinnissamut suleqatigiiffiat, WHO, suleqatigalugu inerniliisumik nalunaarusiaanni nutaami tamanna erserpoq.
Allattoq Carla Davidsen
marsip 10-at 2012 13:32

Nunarsuarmi inuit tamarmik 89 procentii - tassa 6,1 milliardit - imermik minguitsumik 2010-p naalernerani imissaqalersimasut, nalunaarusiami allassimavoq.

Nunarsuarmi inuit 88 procentiisa minguitsumik imissaqalernissaat 2015-imi pissasoq anguniarneqarsimavoq. Anguniagarli maanna tassa anguneqareerpoq, maannalu ilimagineqalerluni nunarsuatsinni inuit 92 procentii minguitsumik 2015-imi imissaqarsinnaalissasut.

- Pingaarutilimmik angusaqarpugut, maannali uniinnassanngilagut. Nappaatit tamarmik 10 procentii erngup mingutsinneqarneranik eqqiluisaannginnermillu pissuteqarput. Alloriarnissarput tulleq tassaasariaqarpoq meeqqanut iliuuseqarnissaq, nunarsuatsinnimi meeqqat piitsuunerpaat atugarliornerpaallu sullinniarnerat ajornakusoornerpaavoq, UNICEF-imi pisortaq, Anthony Lake, oqarpoq.

Erngup minguitsuunissaanik anguniagaq anguneqaraluartoq, peqqinnerulernissatsinnik 2015 nallertinnagu anguniakkat anguneqarnissaat ilimagineqanngilaq. Inuit 2,5 milliardit suli iluamik perusuersartarfeqanngitsut, UNICEF-ip nittartagaani atuarneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq