UNICEF-ip oqartussat suleqatiserai
UNICEF-ip Danmarkimi immikkoortortaqarfiani qullersaq Steen Andersen oqarpoq Kalaallit meerartaasa sullinneqarsinnaanissaat 2007-imili misissuiffigineqartoq.
- UNICEF tassaavoq nunani siuarsagassani suliaqartartoq, miserratigisinnaanngilarpulli Kalaallit Nunaat siuarsimasunut ilaammat meeqqalli ilaat atugarissaarpallaanngillat iliuuseqartoqartariaqarlunilu, Steen Andersen oqarpoq.
- Tusagassiuutitigut ulluni makkunani sammineqartoq tassaavoq kalaallit meerartaasa ilaasa naammattunik nerisassaqartinneqartannginnerat. Naalagaaffiit Peqatigiit meeqqat pisinnaatitaaffii pillugit isumaqatigiissutaanni immikkoortoq 27-i matumani taava unioqqutinneqarsimassaaq. Pisinnaatitaaffiit tunngaviusut matumani pineqarput, meeqqanuinnarli atuunnatik, inunnut tamanut atuupput. Taakkua saniatigut allanik aamma ajornartorsiuteqartoqartoq ukiuni arlaqalersuni ilisimavarput, meeqqammi sumiginnagaasimasut Kalaallit Nunaanni takussaasut amerlaqimmata, atuarfeqarfinnullu tunngasunik aamma ajornartorsiortoqarluni. Misissuinerit tamakkorpassuit paasinarsisippaat, piffissanngorsoraarpullu UNICEF-ip akuunerulernissaa, Steen Andersen Radioaviisimut oqarpoq.
Kalaallit Nunaanni oqartussaasut maanna suleqatiserineqalerput, UNICEF-ip suleriaasaa taamaammaat.
- Nunani tamalaani suleqateqarneq UNICEF-ip misilittagaqarfigaa, tamannalu tunngavigalugu suliassamut pilersaarusiornissaq pingaaruteqarpoq. Paasissutissanik katersisoqassaaq, UNICEF-ip Danmarkimi qullersaa Steen Andersen naggasiilluni oqarpoq.
Naalagaaffiit Peqatigiit meeqqat atugarisaat pillugit isumaqatigiissutaanik unioqqutitsisimasunut allattorsimaffimmut Kalaallit Nunaata ilanngunneqarsimannginnera Steen Andersenip erseqqissaatigaa, taamaattumimmi allattorsimaffeqanngimmat. Isumaqatigiissummik atsioqataasimasut ingerlaavartumik nalilersorneqartarput.
