Ungooraluni umimmanniartarnissaq pilersaarusiorneqarpoq
Allatut umimmanniartarneq tulliani umimmanniartoqalerpat KNAPK-p aamma Maniitsumi piniartut pilersaarusiorpaat. Atuagagdliutini ullumi saqqummersuni taama allaaserinnittoqarpoq.
Qamuteralaat, tassa snescooterit, atorlugit umimmaat ungooriarlugit ungusiviliornissaq pilersaarutaavoq. Umimmaat ungoorneqarlutik katersorneqarnerannit, ungoorivimmullu isertinneqarnerannit, toqorarneqarnissaannut ullut arlallit ingerlassasut KNAPK-p naatsorsuutigaa. AG naapertorlugu Piniarnermut Aalisarnermullu Pisortaqarfik piniartunit oqaloqatigineqareerpoq, siunnersuullu Pisortaqarfimmit ammaffigineqarpoq, naak taama piniariaaseq massakkorpiaq inatsisinik unioqqutitsinerugaluartoq.
Allatut umimmanniartarnissap kissaatigineqarneranut tunuliaqutaavoq, ukiukkut aputeqarpiartannginnera pissutigalugu qimussit qamuteralaallu piniarfissamut anngunniarnerat ajornakusoortarmat, aamma Arctic Green Foodip Kangerlussuarmi tunisassiorfianut anngunniarneq ilungersunartarluni. Umimmaat angutivissat amerleriarujussuarsimanerat tunngavilersuutit aapparaat, KNAPK malillugu amerlivallaarnermikkut nerisassaminnik unammillissuteqarlernissaat pisinnaammat, tamatumalu kinguneranik perlerlutik toqoralernissaannik kinguneqarsinnaalluni.
AG naapertorlugu KNAPK-p Piniarnermik Pisortaqarfik ataatsimeeqatigereerpaa, KNAPK-milu pisortaq John Biilmann isumalluarpoq.
-Annertunerusumik akerleriissuteqarfiunngitsumik taama piniariaatsip atulerneqarnissaa naatsorsuutigaarput, pissutsit taamaannerat Piniarnermut Aalisarnermullu Pisortaqarfiup paasilluareersimammagu, John Billmann AG-mut oqarpoq.
