Ungerutissiaq kapinartulik piiarneqarpoq

Ungerutissiaq kapinartulik Myanmarimi politikerip arnap parnaarussap, Aung San Suu Kyi-p, illua kaajallallugu ikkussugaq, politiinit uniformilinnit ullumi piiarneqarpoq, illuatungiliuttut siulittaasuata illuanut isertarissami allungiartorfiit kikiattalersukkat ilutigalugu aamma piiarneqarlutik. Allungiartorfiit kikiattallit taakku biilinik takkuttoqatsaaliuinermut atorneqarsimapput.

Franskit nutaarsiassaqartitsiviat, AFP, ullumi taama nalunaarpoq.

Suu Kyi-p illuata silataaniittoq ungaloq kapinartulik sooq peerneqarnersoq Myanmarip sakkutuuisa nassuiaatissaqartinnginnerarpaat.

Suu Kyip aneqqusaannginnera aqagu naappat parnaarussaanerminit iperagaanissaa, Naalagaaffiit Peqatigiit pisortaata, Kofi Annanip, sakkutuut naalagaannut, Than Shwe-mut, toqqaannartumik qinnutigigaluarpaa, taama pisoqareersorlu pineqartup najugaqarfia kingumut susoqarfiorujussualerpoq.

- Suu Kyi iperagaappat naalakkersuisut oqaloqatigiinnissaat ajornannginnerulissagaluarpoq, Annan oqarpoq.

Aung San Suu Kyi partiialu NLD 1990-imi qinersinermi ajugaarujussuaraluarput, nunaminnili naalakkersuinissaminnut akuerineqanngisaannarlutik. Suu Kyip ukiuni 17-ini aneqqusaannginnermini ukiut qulit atoreerpai.