Ungasissumut parrutilerput

Qajartorluni Kalaallit Nunaanni aasaru pissartanngorniuttoqareerpat, Paamiuniit Narsalimmut uterlugulu qaannamik parrulluni aasaru juulimi aamma unammersuartoqassaaq.
Allattoq Mads Lynge
januaarip 29-at 2012 16:16

Paamiuni peqatigiiffiit Peqatigiiffik Paamiut aamma Peqatigiiffik Narsalik takornarialerinermi siunnersorti Helga Lorentzen ataatsimeeqatigereerlugu taama aalajangiisoqarsimasoq, Kommuneqarfik Sermersuup nittartagaani atuarneqarsinnaavoq.

Parrunneq "Paartoq 2012"-imik taaguuserneqarsimasoq ullunut marlunnut avinneqassaaq, parrunnissarlu 110 kilometeringajannik takissuseqassalluni.

Qajarissanik Paamiuni takornarialerinermik sulialinnit aasaru attartortoqarsinnaalissaaq, soqutiginnittullu nunanit allaneersut "Paartoq 2012"-imut aamma peqataasinnaassallutik.

Aningaasanik katersuiniarnissaq tapersersuisussanillu ujarlernissaq apeqqutaatillugu akissarsiarititassatut siunniunneqarput qajavinnik paartuni siulleq 20.000 koruunit, tullia 15.000 koruunit pingajuallu 10.000 koruunit.

"Paartoq 2012" juulip 14-iani aamma 15-iani ingerlanneqassaaq.

Oqaaseq paartoq qanga nunaqarfiit illoqarfiillu akornanni ungasissorsuarmut paarlutik allakkisartuusarsimasut taaguutigisimavaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk