Ungasissumut angalanissamut alloriarneq siulleq
Sisimiuni ilinniarnertuunngorniarfimmi ilinniartut ilarpassui illoqarfiup avataaneersuupput illoqarfillu kulturikkullu neqeroorutaasut ilisimasaqarfivallaarnagit. Taamaammat atuarfimmi ”imminnut mattoqqajaasarsimapput”. Tamanna ilinniartunut peqqinnartuunngilaq, ilinniarnertuunngorniarfiullu pisortaata Poul V. B. Jensenip kulturikkullu illorsuup pisortaata Arnajarak Støvlbækip tamatuma allanngortinneqarnissaa isumaqatigiissutigaat.
-Qaammat aallartilaartoq paasissutissiilluta ataatsimiisitsivugut, atuarfimmilu ilinniartut ilamininngui maanga kulturikkut illorsuarmut pulaarlutik. Tassunga atatillugu maani illorsuarmi aaqqissuussinernut isumassarsianik saqqummiussisussamik suleqatigiissitaliorpugut. Atuartut amerlavallaanngitsut tunniusimalluartut isumassarsiarpassuaqartullu pulaartoraagut. Siunnersuutigineqartut ilagaat seqertitsivissuatta Playstationimik unamminermut atorneqarsinnaanissaa, siunnersuullu taanna maanna misissorneqartut ilagaat, Arnajarak Støvlbæk knr.gl-imut oqaluttuarpoq.
Alloriarnerit tullerissavaat atuarfimmi ilinniartut siunnersuisoqatigiivisa suliniummut akuutinnissaat, Arnarajak Støvlbækillu ilinniartut siunnersuisoqatigiivinit qaaqquneqarnissani maanna utaqqivaa, kulturikkut illorsuami Taseralimmi suliniutinik nutaanik periarfissanillu ilisimatissinnaaniassagamigit.
-Aamma ilinniarfiup ilinniartuutai erinarsortartunik qitittartunillu pikkorissorsuarnik ilaqarput, taakkulu soorunami maani illorsuarmi takutitsinissaat kissaatigaarput. Aaqqissuunnernut anginngitsunut anginerusunullu inissaqartitsivugut, suleqatigiinnittalu aaqqissuussaanerulernissaa qilanaarivara. Ilinniartut isumassarsiaat pitsaasorpassuit maani illorsuarmi piviusortittariaqarpagut, Arnajarak Støvlbæk isumaqarpoq.
