Ungasinnerusoq isigigalugu politikkeqarnissaq sulisitsisut ujartorpaat

Sulisitsisut Peqatigiiffiat Danmarkimi Inuussutissarsiuteqartut Peqatigiiffiat suleqatigalugu suliffeqarfinnut Sulisitsisut Peqatigiiffiannut ilaasortanut qinersinissamut atatillugu paasiniaaqqissaarsimapput. Paasiniaanerit inernerisa takutippaat, marlunngorpat qinersereerutta Inatsisartut Naalakkersuisullu nutaat, Sulisitsisut Peqatigiiffiannut ilaasortat isumaat naapertorlugit, suut pingaartinnerusariaqarneraat.

Tassalu meeqqat inuusuttullu, siunissaq ungasinnerusoq isigalugu, atugarissaarnerulernissaat, paasiniaaqqissaarfigineqartut tamarmik salliutippaat.

Paasiniaaqqissaarnermi inernerit naapertorlugit inuussutissarsiortorpassuit politikerinut tatiginnikkunnaarsimanerat inuiaqatigiinni ullumikkut ajornartorsiutit annerpaat ilagaat. Paasiniaaqqissaarfigineqartut 88 procentii akipput, politikerinut "immannguaannaq" tatiginnillutik, imaluunniit "tatiginninngilluinnarlutik", amerlanerillu isumaqarput kammalaasersortoqarpallaartoq.

- Paasiniaaqqissaarnerup erseqqissumik uppernarsarpaa, inuussutissarsiortut kalaallinut politikerinut amerlanernut tatiginnikkunnaarsimasut. Kalaallit Nunaat unammillertorujussuusussanngorpoq, maannakkullu politikerit tamanna nammassinnaassaneraat inuussutissarsiutilippassuit eqqarsarnartoqartippaat, Sulisitsisut Peqatigiiffianni siulittaasoq, Henrik Leth, oqarpoq.

Danmarkimi Inuussutissarsiuteqartut Peqatigiiffiata immersugassamut nassiutaanut suliffeqarfinnit 333-usunit 133-t immersuisimapput. Tassa Sulisitsisut Peqatigiiffiannut

ilaasortat 40 procentii.