Ungasianiit nakorsiartitsisalernissaq Napparsimasut peqatigiiffiata ernumanartoqartippaa

Nunatsinni Napparsimasut Kattuffiata ungasianiit nakorsiartitsinermi atortorissaaruteqalernissaq nakorsiartartunut pitsaaquteqarnissaa isumalluarnartoqartippaat, taamaakkaluartorli aamma misissuinermi assilisanik uninngatitsiinnartoortarnissaq Napparsimasut Kattuffiata Qaqortumi attaveqaataasup Bent Ole Kleistip ernumanarsinnaasutut oqaatigaa:

-Isumalluarpugut imaassappat, toqqaannartumik misissortinnerup nalaani akineqarsinnaassaguni qanoq misissortinneq ingerlaqqissinnaanersoq imalt. suna nassuiaatissartarisinnaasaa pissarsiarisinnaagaanni. Ernumassutigisinnaasara unaavoq, assersuutigalugu misissortinnermi assiliseriarluni taakku assit arlaannut nassiunneqartassappata, tassanilu arlaannut qarasaasianut inissinneqarallarlutik kingusinnerusukkut nakorsanit misissugassanngorlugit. Taannartaa ernumagisinnaavara arlaatigut kipiluttunartoqarsinnaanera, Bent Ole Kleist nassuiaavoq. Apereqqipparput tassa ernumanartoqartinneraat, ima akivoq:

-Ernumanartoqartinngilarput, apeqqutaavorlu misissueriaaseq taanna qanoq ingerlassanersoq. Toqqaannartumik nakorsanit misissorneqartassappata ernumanartussaqanngilaq, kisianni allatulli aamma qarasaasianut toqqorallarneqartassappata kingusinnerusukkut nakorsaq piffissaqaleruni misissussagai, taanna ernumanartoqarsinnaavoq sivisuallaamik uninngatinneqartarnissaat. Kisianni neriuppugut toqqaannartumik misissorneqartarnissaat, Bent Ole Kleist oqarpoq, nangillunilu:

-Takussutissanngussooq atuleriaruni qanoq ingerlanersoq, kisianni nutaajugami aamma allanik tusartakkatsitut nunani allani iluaqutaaffeqartukuluugami, neriussuugut maani aamma taamaassasoq, Napparsimasut Kattuffiata Qaqortumi attaveqaataa Bent Ole Kleist naggasiilluni taama oqarpoq.