Ungasianiit nakorsiartitsisalernissaq isumalluarfigineqarpoq

Nunatsinni qarasaasiaq atorlugu ungasianiit nakorsiartitsinermi atortorissaarut nutaaq Pipalummik taaneqartoq,

misissueriaatsinik assigiinngitsunik piginnaasaqarluartoq, nakorsianut peqqinnissaqarfimmilu sullissinerup pitsanngoriarnissaanik isumalluarfiusoq, nakorsap Kalaallit Nunaannilu peqqinnissaqarfimmi siunnersortaanerup Kent Kleinschmidtip oqaatigaa:

-Isumalluartorujorujussuuvoq, taamaasilluni massakkut nakorsiartarneq nunaqarfinninngaanniit ilaatigullu illoqarfinninngaanniit immaqa kipisaqattaarpallaarnani ukioq tamaat ingerlasinnaalissappat suleriaaseq pitsanngorsinnaavoq, Kent Kleinscmidt isumalluaqisoq oqarpoq nangillunilu:

-Tassa nunatsinni nunaqarfiit 50-it sinnerlugit inuttallit tamaviisa atortorissaarutinik taamaattunik pilersorniarpavut, aamma illoqarfiit, taavalu aamma manna napparsimavissuaq Sana nakorsiartarfillu aamma pilersorniarpavut.

Tamanna ingerlanniarparput ukiut tulliuttut marluk affaatalu ingerlaneranni. Ukioq manna 15-it ikkunneqassapput, aappaagu 31-it ikkussoriarlugit, taava taava sinneri 2010-mi ikkussussavagut, Kent Kleinschmidt nassuiaavoq. Aperaarput atortorissaarut misissuinermi ilaatigut sunik piginnaaneqarnersoq qanoq oqaluttuarisinnaaneraa, ima akivoq:

- Atortorissaarutit tamarmik assakaasulimmi ilisivimmut 1 meter 65 cm-it missaani portuutigisumiittoq oqaluttuarilaassagukku, qulaaniippoq qulleq sakkortoorujussuaq misissuutinut assigiinngitsunut ikkunneqarsinnaasoq, uagullu ullumikkut siutinut misissuummut atatipparput, aammali erlunnut misissuutinut allanullu assiliissutinut immikkoortunut atorneqarsinnaalluni. Taassuma sanianiippoq filmiliuuteerannguaq malussarissorujussuaq, immineerluni takunnissinnaassuseq tunaartaralugu isigisavut pitsaalluinnartuunissai anguniartuaannarpai, tassa erseqqissisilluinnartitsisinnaasoq. Aamma napisoqarsimappat timimiluunniit eqqumiigisaqarluni takutitsiniaraanni assiliiginnarnissamut tulluanngitsumut filmiliuutigalugu atorneqarsinnaasoq, tassanilu 9 minutsi toqqorneqarsinnaavoq taakkualu illoqarfimmut nassiunneqarsinnaallutik, Kent Kleinschmidt oqaluttuarpoq erseqqissarlugulu atortorissaarut qarasaasiaasoq naliginnaalluinnartoq. Imalu nassuiaanini nangillugu:

-Skærmi takujuminartunik tuugassanik attulaaginnarlugu sullissinini suliap ingerlannissaanut periarfissaqarpoq, ilaatigut oqaatsit pingasut, tassalu tuluttut, qallunaatut kalaallisulluunniit sorliit atorneqarniarnersut toqqarneqarsinnaallutik. Assut atoruminarpoq, atortorissaarutillu amerlagaluartut ilinniarsimavallaanngikkaluarluniluunniit ulloq ataaseq atorlugu aqunnera ilinniarneqarsinnaasoq, Kalaallit Nunaannilu peqqinnissaqarfimmi siunnersortaaneq Kent Kleinschmidt nassuiaavoq.

Qarasaasiaq atorlugu ungasianiit nakorsiartitsinermut atortorissaarut siulleq, sapaatip akunnerata tulliani pingasunngornermi 22. oktober Paamiuni pisortatigoortumik atoqqaartinneqassaaq, sinerissamilu illoqarfinni nunaqarfinnilu atortorissaarutilersuineq 2010-p tungaanut ingerlanneqassasoq pilersaarutaavoq.