Borgmesteri: UNESCO-mi ilanngunneqarneq pisussaaffiliivoq
Kujataani nunaminertat tallimat, UNESCO-p, tassa Naalagaaffiit Peqatigiit ilinniartitaanermut, ilisimatusarnermut kulturimullu suleqatigiiffiisa nunarsuarmi nunat eriagisassat allattorsimaffiannut ippassaq sapaammi ilanngunneqarput.
Nunaminertallu taama ilanngunneqarnerat Kommune Kujallermi borgmesterip nuannaarutigaa:
AAMMA ATUARUK Kujataa eriagisassat allattorsimaffiannut ilanngunneqarpoq
- Suliaq una ukiuni arlaqalersuni Kommune Kujallermiit sukumiisumik suliarineqarsimavoq, taamaammat qinnuteqaatigineqartoq akuersissutigineqarmat assorujussuaq tuppallerlutalu nuannaarpugut. Aamma soorunalimi misigisimavugut angorusutarput angullutigu, Kommune Kujallermi borgmesteri Kiista P. Isaksen oqarpoq, nangillunilu:
- Taamaammat nunarput tamaat aammalu Kommune Kujallermi kikkut tamarmik suleqataasimasut suliamullu tapersersuilluarsimasut tamaasa qujassuteqarfigalugit pilluaqqorusuppakka.
Nunaminertat pineqartut tassaapput: Qassiarsuk, Igaliku, Sissarluttoq, Tasikulooq kiisalu Qaqortukulooq-Upernaviarsuk.
Kujataani nunaminertat qulaani pineqartut UNESCO-p eriagisassatut allattorsimaffianut ilanngunneqarnerat Kujataanut nunatsinnullumi pisussaaffiliisoq, Kiista P. Isaksenip oqaatigaa.
Eqqumaffigineqarnerput annertusissasoq
- Soorunami pisussaaffiliivoq aamma taama ilanngunneqarnermi soorunami mianerisassaqarpugut. Pisussaaffeqarpugut nangitsitseqqilluta taamatut suliaqarnissami. Tamatta nunarsuarmioqatigiinnut ilanngunneqaratta eqqumaffigineqarnerput annertusissaaq, Kommune Kujallermi borgmesteri Kiista P. Isaksen oqarpoq.
Tunulliarfimmi Igalikullu Kangerluani nunaminertat UNESCO-p nunarsuarmi eriagisassatut allattorsimaffianut ilanngunneqarnerat, Kultureqarnermut Naalakkersuisoqarfiup, Nunatta Katersugaasiviata Allagaateqarfiatalu Danmarkillu Kultureqarnermut Ministereqarfiata ukiorpaalunngulersuni suleqatigiilluarnerisigut piviusunngortinneqarpoq.
UNESCO ukiumoortumik sapaatip-akunnerata naanerani ataatsimeersuarpoq, tamatumuuna Krakowimi, Polenimi ataatsimeersuartoqarluni.
