Unatarneqarnissartik aarleqqutigisarsimavaat
"Suna pillugu oqaloqatigiumalluta paasitinniaqinasigit, unatarneqaqinaagut - Suli annertunerusumik paasisaqarusukkuit peroorsaasugut paasitinnagit suna pillugu oqaloqatiginiarneritsigut saaffiginiartigut, annertoorujussuugamik paasitikkusutagut. nalunnginnatsigu paaqqinnittarfik sunaluunniit meeqqanut atornerluisartut akuerineqarsinnaanngisoq.
Akunneq ataaseq atorlugu periarfissatuarput taamak allaffigaatsigit.
P.S. Piaakannersumik paasiniaaffigitigut.! Sunalu pillugu oqaloqatigiumalluta paasitinniaqinasigit unatarneqaqinaagut".
Umiarsuaaqqami atuarfiutigisumi Tûgdlimmi meeqqat atuartut allagaanni, Namminersornerullutik Oqartussat isumaginninnermut immikkoortuanut 2002-mili nassiussaanni, titarnerit ilaat taama allanneqarput.
Uppernarsaatini Namminersorlutik Oqartussaneersuni, pisortallu pasissutissaataannik paasissutissiinneqarnissamik Radioaviisip qinnuteqarnermigut pissarsiarisaanik tamakkua atuarneqarsinnaapput.
Ulloq unnuarlu angerlarsimaffiup namminersortup, umiarsuaaqqap atuarfiutigisup Tûgdliup, ulloq unnuarlu angerlarsimaffittut akuersissutini maajip aallaqqaataani annaavaa. Tamanna pivoq, "pissutsit isumakulunnartorujussuit atortinneqarnerat" Namminersorlutik Oqartussanit paasisaqarfigineqarmata.
Pisortat pasissutissaataannik paasissutissiinneqarnerup takutippaa, umiarsuaaqqami pissutsit siusinnerujussuakkut isornartorsiorneqareersimasut, ilaatigut meeqqanit tassani inissinneqarsimasunit.
Pappialami allami aamma 2002-meersumi atuarneqarsinnaavoq, nukappiaraq Tûgdlimmi najugaqartoq Namminersornerullutik Oqartussanit kalerreeqqaarani pulaarneqarsimasoq. Oqaluttuarpoq, qimaaniarnini pissutigalugu sulisumit kiinnamiut annersarneqarsimalluni, qinngamigut aalerluni. Nukappiaraq aamma oqaluttuarpoq, uinimmini anillannerit iluaagisani pillugit nakorsiarniaraluarami itigartitaasimalluni.
Nukappiaqqat Tûgdlimmiittut Isumaginninnermut Pisortaqarfimmiit 2002-mi ukiakkut aggersarneqarput, Tûgdlimmi pissutsit oqaloqatigiissutigineqassammata. Piginnittoq, Tom Lynge, allallu marluk tamatuma kingorna aamma ataatsimiigiaqquneqarput. Ataatsimiigiaqqusissut naapertorlugu aggersaasoqarpoq, Tûgdlik pillugu arlalinnik saaffiginnittoqarsimammat isumakululersitsisunik.
Imaqarniliaq napertorlugu ataatsimiittut isumaqatigiipput, Tûgdliup aamma ulloq unnuarlu angerlarsimaffinnut immikkoortoqarfiup suleqatigiinneq nangissagaat, 2002-milu juullertinnagu nutamik naliliisoqassasoq.
Pappialanili ukiuni kingusinnerusuneersuni ersippoq, Tûgdlimmi annersaaneq pillugu arlaleriarluni naammagittaalliortoqarsimasoq.
Maannalu paasisat kingulliit tunngavigalugit Tûgdlik-mut tunngasut naatsumik uteqqilaariartigik:
Mette Sonniks, Kommuneqarfik Sermersuumi Meeqqanut Ilaqutariinnullu Immikkoortortami pisortaasoq, meeqqanut Tûgdlik-mut inissinneqarsimasunut akisussaasuusoq, Tûgdlik-mik suleqateqarneq siusinnerusukkut "ajunngitsutut" Radioaviisimut oqaatigaa.
Nakkutilliineq kommunimit ingerlanneqartoq, Sonniksip ernumanartoqartinnginnerarpaa.
Tamatumunnga atatillugu meeqqanut assigiinngitsunut tallimanut Tûgdlik-mi nakuusertoqarsimaneranik Nuummi Politiinut nalunaaruteqartoqarsimanera, qanittukkut saqqummiunneqarpoq.
Aamma Tûgdliup illersuisuata Finn Meinelip siusinnerusukkut, Tûgdlik-mut akuersissutip atorunnaarsinneqarnera "tuaviuussatut" taavaa.
Taamaattorli meeqqat Tûgdlik-mut inissitaasut oqartussanut allagaat, Radioaviisimit paasineqartut, Tûgdlimmi suliniummut akisussaasup Tom Lyngep imminut isigineranut naapertuutinngillat:
- Inuunermi suliap tassanngaannaq unitsinneqarnera takullugu assut nuanniippoq. Sumulli tamaanga qiviaraangama suliarisimasakka tulluusimaarutigisarpakka, Atuagagdliutinut aqagu saqqummersussanut, nittartakkamiilereersumut taama oqarpoq.
Radioaviisip paasisai naapertorlugit angajoqqaat meeqqamik Tûgdlik-mi paaqqutarineqarnerat pillugu arlaleriarlutik naammagittaalliuuteqartarsimapput. Taakkua Radioaviisimit tusagaqarfiginissaat soqutigisorujussuuarput, soorluttaaq Tûgdlik-mmi siornatigut ullutsinnilu inuttaasimasut, Tûgdlik-mi pissutsinik ilisimasaqartut attavigisinnaavaatigut uunga radioaviisi@knr.gl
Pisortat pasissutissaataannik paasissutissiinneqarnermit qupperinerit 500-nit amerlanerusut KNR-imi ulluni tulliuttuni misissuataassavagut.
