Nuummi tillinniarnertalimmik saassussisoqarsimaneranut atatillugu inuit marluk Nuummi politiit ujaaraat
Angut 20-nik ukiulik angutinit arfinilinnit kattutsilluni inissiarsuit ilaanni blok 17-ip opgangiani ippassaq ulloqeqqata kingorna nalunaaqutaq marlunut aningaasiveersilluni saassutsissimavoq.
Angutip allap saassutsittoq ikiorniarsimagaluarpaa, iluatsinngitsumik. Angut ikiuiniaraluartoq aamma arlaleriarluni tilluartissimavoq.
Angutit inuusuttut saassussisut 16-it 18-illu akornanni ukioqassangatinneqarput, taakkunanngalu marluk atisaatigut ilisarnaatai Nuummi politiinit saqqummiunneqarput.
Aappaa aappaluttumik nasaqarpoq taartumillu tuiisigut aappaluttortalimmik kavaajaqarluni, qarliilu qasertuullutik.
Saassussisup aappaa qernertumik nasaqarpoq, sungaartumik kavaajaqarluni qasertunillu qarleqarluni.
Sassussisimasut sinnerisa isikkui politiinit paasineqarsimanngillat, saassussinermullu ilisimannittoqarpat politiinut saaffiginnittoqarsinnaavoq.
Fjernsyninik, qarasaasianik angallattakkanik DVD-nillunniit akikitsunik inunnik neqeroorfigitittoqarsimappat Nuummi politiit aamma paasisaqarusupput.
Pingasunngornerup sisamanngornerullu unnuaani Nuummi Brugsenimi 58.000 koruunit nalinginut tillinniartoqarsimavoq, Nuummilu politiit innuttaasut qinnuigaat isiginnaarutinik nipilersuutinilluunniit akikitsunik tuniniaavigineqassagaluarunik mianersoqqullugit.
- Pisisoqarsimassaluarpat pisisoq tillikkanik pisisimasutut unnerluunneqassaaq, politiini pigaartoq ilisimatitsivoq.
Tillinniarsimasunik ilisimannittoqarpat politiit attaveqarfigeqquneqarput, oqarasuaat 32 14 48, tassa 32 14 48.