Unammiuaarnermi angusat naammagisimaarpai

Ujaminnattaarineqartut ilimagisamit ikinnerupput, tassami ukiut marluk matuma siornagut unammiuaarnermi kalaallit arfineq-pingasunik ujaminnakkamik.

Kalaallit Nunaanni timersoqatigiiffiit kattuffianni siulittaasup, Nuka Kleemannip kalaallit timersortartuisa angusaat naammagisimaarpai.

 Ujaminnatat ikinnerunerat sulorarnermik unammisartut pitsaanerit peqataanngitsoornerannik aamma bronzinnanniarnerup allanngortinneqarneranik ilaatigut nassuiaatissaqarpoq.

Ujaminnatalli ikinnerugaluartut Nuka Kleemannip kalaallit timersortartui takutitsilluarnerarpai.

- Kalaallit unammerusussuseqarput timersortartorpalaartumillu takutitsinerat tulluusimaarutissaalluni.

Piareersarluarsimanerusariaqaraluarpat?

- Piareersarluarsimanissaat kuttuffiisa ataasiakkaat akisussaaffigivaat, Nuka Kleemann oqarpoq.

Isle of Wightimi ukioq manna angusat annikinnerugaluartut Qeqertarmiullu Unammiuaarneranni peqataasitsineq akikitsuinnaanngikkaluartoq  Nuka Kleemannip kalaallit peqataanerat pingaaruteqarnerarpaa:

- Qeqertaaqqat nalingisavut ukiut marlukkaarlugit naapittarnissaat pingaaruteqarpoq, Nuka Kleemann oqarpoq, nangillunilu:

- Soorunami timersortartut unammisaqattaarnissaat pingaarnerpaavoq, taamatullu medaljannannissaq pingaarnerpaalluni. Taamaattumik tullissaanut sungiusarnerusariaqarpugut, Nuka Kleemann oqarpoq.